"Valideyn komitələrinin rəsmiləşməsi..."- Ekspert

"Valideyn komitələrinin rəsmiləşdirilməsi məktəb idarəçiliyi ilə bağlı ictimai gözləntilərin dəyişməsini əks etdirir. Məktəblərdə maliyyə və təşkilati məsələlərin valideynlərin öhdəsinə buraxılması uzun illərdir cəmiyyətin müzakirə mövzusu olsa da, bu proses əksər hallarda qanuni çərçivədən kənar şəkildə həyata keçirilib".

AzTehsil.com xəbər verir ki, bu fikirləri  təhsil eksperti Kamran Əsədov məktəblərdə mövcud olan valdeyn komitələrinin rəsmiləşdiirlməsi ilə bağlı verilən təkliflərdən danışarkən bildirdi.

"Statistik məlumatlar da göstərir ki, Elm və Təhsil Nazirliyinə, Məktəbəqədər və Ümumi Təhsil üzrə Dövlət Agentliyinə daxil olan şikayətlərin əhəmiyyətli hissəsi - bəzi illərdə 40 faizə qədər - valideynlərdən pul yığılması ilə bağlıdır. Bu isə onu deməyə əsas verir ki, hazırkı vəziyyətdə valideyn komitələrinin fəaliyyəti daha çox maliyyə toplama mexanizminə çevrilib. Əgər bu qurumlar rəsmi status qazansa, qanunla müəyyən olunmuş qaydalara tabe edilərsə, neqativ halların qarşısını almaq mümkün olar".

Onun fikrincə, rəsmiləşdirilmiş valideyn komitələri təhsil müəssisələrində ictimai iştirakçılığı artırar, valideynlərin məktəbin tədris mühiti ilə bağlı qərarların qəbuluna daha şəffaf formada qatılmasına imkan verər:

"Belə komitələr sosial layihələrdə, məktəb mühitinin sağlamlaşdırılmasında, şagirdlərin davranış problemlərinin həllində və məktəb-valideyn münasibətlərinin tənzimlənməsində faydalı rol oynaya bilər. 

"Amma postsovet məkanında - xüsusilə Rusiya və Ukrayna təcrübəsində - valideyn komitələrinin rəsmiləşdirilməsi çox zaman “leqal pul toplama mexanizmi”nə çevrilib. Bu isə korrupsiya elementlərini gücləndirib, müəllimlərlə valideynlər arasında süni gərginlik yaradıb və təhsil müəssisəsinin şəffaflığını azaldıb. Azərbaycan üçün də risk odur ki, əgər bu qurumların fəaliyyət dairəsi aydın şəkildə müəyyən olunmazsa, rəsmiləşmə ilə bərabər neqativ praktika qanuni don geyinə bilər.

Valideyn komitələrinin rəsmiləşdirilməsi potensial olaraq faydalı ideyadır, amma bu, yalnız ciddi qanuni tənzimləmə və ictimai nəzarət mexanizmləri ilə müşayiət olunarsa, real nəticə verəcək. Əks halda, illərdir müzakirə olunan problemin formal olaraq davam etməsi qaçılmaz olacaq. Müəllimlər hər zaman hörmət və dəstəyə layiqdirlər və onların nüfuzunu qorumaq üçün valideynlərin məsuliyyətli davranışı əsas şərtdir. Elm və Təhsil Nazirliyinin bu istiqamətdə gördüyü işlər, yayımladığı qadağalar və mövqeyin prinsipiallığı isə təhsilin sağlam gələcəyinə hesablanmış müsbət addımdır.