Akademiyaya qəbul olmaq istəyən oğlan dələduzluqla üzləşib

Milli Aviasiya Akademiyasına qəbul olmaq istəyən şəxsə qarşı dələduzluq edilib. 

AzTehsil.com əldə etdiyi xəbərə görə, Lerik rayon sakini, 1977-ci il təvəllüdlü Altay Abbasov özgənin əmlakını ələ keçirmək məqsədi ilə Malik vasitəsilə 2019-cu ilin fevral ayında görüşüb və tanış olduğu Vahidin Milli Aviasiya Akademiyasına qəbul olunub, təhsil almaq istədiyini öyrənib. 

Abbasov bunu bildikdən sonra özünü ona işgüzar şəxs kimi göstərib və geniş əlaqələrinin olduğunu deyib, 6500 manat verdiyi halda onu Milli Aviasiya Akademiyasının radioelektron avadanlıqları fakültəsinə qiyabi şöbəyə qəbul etdirəcəyinə, həmin Akademiyanı təhsil almaqla bitirəcəyinə dair 2023-cü ildə ona diplom verdirəcəyinə dair yalan vəd verib.

Daha sonra zərərçəkmiş şəxsi aldadaraq razılaşdıqdan sonra 2019-2022-ci illər ərzində ondan 6500 manatı alıb. 

Altay Abbasovun barəsində Cinayət Məcəlləsinin 178.2.4-cü (xeyli miqdarda ziyan vurmaqla dələduzluq törətmək) maddəsi ilə ittiham elan edilib. 

Bu işə Xəzər Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkmiş şəxsə dəymiş ziyanı tamamilə ödəyib. Bundan əlavə təqsirləndirilən şəxs tərəfindən dövlət nəfinə dəymiş ziyanın 25 faizi ilə bağlı 1625 manat ödəniş olunub.

Məhkəmənin hökmü ilə Altay Abbasov Cinayət Məcəlləsinin 73-1.2-ci maddəsinə əsasən, yəni zərərçəkmiş şəxslə barışdığı, dəymiş ziyanı tamamilə ödədiyi və cinayət nəticəsində vurulmuş ziyanın iyirmi beş faizi miqdarında dövlət büdcəsinə ödəniş etdiyi üçün cinayət məsuliyyətindən azad edilib. 

Onun barəsində Cinayət Məcəllənin 178.2.4-cü maddəsi ilə barəsində olan cinayət təqibinə xitam verilib. Barəsində seçilmiş həbs qətimkan tədbiri ləğv edilib və o məhkəmə iclas zalından həbsdən azad edilib.