İdman Akademiyasının məzunları iş tapa bilir?
Ali təhsil müəssisələrinin məzunlarının əmək bazarına inteqrasiyası ölkənin iqtisadi inkişafı və insan kapitalı siyasətinin effektivliyini əks etdirən mühüm göstəricidir. Universitetlərin məzunları ixtisaslarına uyğun şəkildə işlə təmin olunmadıqda, bu həm təhsil sistemindəki struktur problemlərə, həm də əmək bazarındakı balanssızlığa işarə edir. Azərbaycanda son illər sözügedən sahədə müəyyən addımlar atılsa da, müxtəlif universitetlər üzrə məzunların işlə təminat göstəriciləri arasında ciddi fərqlər müşahidə olunur.
Dövlət Məşğulluq Agentliyi tərəfindən hazırlanan “Məzunların məşğulluq reytinqi” platformasında 2018-2022-ci illər arasında Azərbaycanda fəaliyyət göstərən universitetlərin məzunlarının əmək bazarındakı yeri ilə bağlı məlumatlar dərc edilib.
Qeyd edək ki, platforma universitetlərin özləri tərəfindən təqdim edilən məlumatlar əsasında hazırlanıb. Hesablama şəxslərin məzun olduqdan sonra iki il ərzində ilk əmək müqaviləsi əsasında aparılıb.
AzTehsil.com- n əldə etdiyi məlumata görə bu dəfə Azərbaycan İdman Akademiyasının (AİA) məzunları ilə bağlı vəziyyəti araşdırılıb.
AİA-da 6 ixtisas üzrə dərslər keçirilir. Hər ixtisas həm Azərbaycan, həm də rus dilində tədris olunur.
Məlumata görə, 5 il ərzində universitetdən məzun olanların ümumi sayı 3 min 430 nəfər olub ki, onların da 1690-ı işlə təmin olunub. Bu da ümumi məzunların 49,3 faizini təşkil edir.
Muzdla işləyənlərin 79,1 faizi özəl, 20, 9 faizi isə dövlət müəssələrində çalışır. İşlə təmin olunan məzunların 92,6 faizi kişi, 7,4 faizi isə qadın olub. İşlə təmin olunmayanlarda isə bu rəqəmlər müvafiq olaraq 96,2 faizi 3,8 faiz olub.
Əmək bazarına daxil olan məzunların mütləq əksəriyyəti, -1129-u aylıq 400 manat əməkhaqqı alır. Məzunların 381-nin işə düzəlmə müddəti 16-18 ay aralığındadır.
Digər göstəricilər:
Məzunların 1 ayadək müddətdə işlə təmin olunanlarının sayı 298 nəfərdir.
2–3 ay ərzində iş tapanların ümumi sayı 118 nəfər olub.
4–6 ay müddətində 63 nəfər işə düzəlib.
7–9 ay ərzində 65 nəfər iş tapıb.
10–12 ay müddətində işə qəbul olunanların sayı 58 nəfərdir.
13–15 ay zaman intervalında 340 nəfər işlə təmin olunub.
19–20 ay müddətində 142 nəfər işə düzəlib.
21–23 ay ərzində 203 nəfər iş tapıb.
24 ay müddətində isə işə qəbul olunanların sayı 22 nəfərdir.
İxtisaslar üzrə cəmi məzun sayı aşağıdakı kimidir:
Bədən tərbiyəsi və idman (əyani) ixtisası üzrə ümumi məzun sayı 2016 nəfərdir. Bu məzunlardan 960 nəfəri işə qəbul edilib. Beləliklə, ixtisas üzrə məzunların təxminən 47 faizi əmək bazarında özünə yer tapa bilib.
Məşqçi (idman növü üzrə) ixtisası üzrə isə ümumi məzun sayı 949, onlardan 467 nəfəri işlə təmin olunub. Bu sahədə işlə təminat faizi təqribən 49 faiz təşkil edir.
Fiziki tərbiyə və çağırışaqədərki hazırlıq ixtisasında 217 məzundan 111 nəfəri işə qəbul olunub ki, bu da 51 faiz-ə yaxın göstəricidir.
İdman menecmenti və kommunikasiya ixtisasında məzun sayı 118, işlə təmin olunanların sayı isə 79 nəfərdir. Bu ixtisas üzrə işlə təminat faizi 67 faiz-ə yaxın görünür.
Bədən tərbiyəsi və idmanda reabilitasiya ixtisasında 65 məzundan 42 nəfəri iş tapıb (təxminən 64 faiz).
Fiziki tərbiyə və çağırışaqədərki hazırlıq (təkrar qeyd olunan) istiqamətində 65 məzundan 31 nəfəri işə qəbul edilib (təxminən 48 faiz)
