“Suverenlik bizim milli sərvətimizdir” mövzusunda tədbir keçirilib...
AzTehsil.com xəbər verir ki, Quba - Xaçmaz Regional Təhsil İdarəsinin tabeliyində olan Quba rayon Qaraçay qəsəbə tam orta ümumtəhsil məktədə “Konstitusiya və Suverenlik İli” çərçivəsində “Suverenlik bizim milli sərvətimizdir” mövzusunda tədbir keçirilib.
Tədbir iştirakçıları əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsini bir dəqiqəlik sükutla yad ediblər.
Tədbirdə YAP Quba rayon təşkilatının sədri Fidan Hüseynova çıxış edərək bildirib ki, Azərbaycan Respublikasının Prezidenti İlham Əliyev tərəfindən 2025-ci ilin “Konstitusiya və Suverenlik İli” elan edilməsi dövlətçilik tariximiz üçün xüsusi əhəmiyyətə malikdir. Sədr qeyd edib ki, Azərbaycan xalqı hər il 20 Sentyabr tarixini milli qürur, azadlıq və dövlətçilik rəmzi kimi qeyd edir. Bu günün təsis olunması gənc nəslin tarixi proseslərdən məlumatlı olması və müstəqilliyin hansı çətinliklər hesabına qazanıldığını anlaması baxımından böyük əhəmiyyət kəsb edir.
Tədbirdə həmçinin Qaraçay qəsəbə tam orta məktəbinin direktoru Fəridə Dostuyeva, ərazi partiya təşkilatının sədri Bariz Allahverdiyev, Axıska türklərinin "Vətən" İctimai Birliyinin şimal bölgəsi üzrə sədri Səlimcan Rizmanov, Birinci Qarabağ müharibəsi qazisi Oktay Qarayev və 44 günlük Vətən müharibəsi veteranı Məhəmməd Əsədullayev çıxış edərək bildiriblər ki, Prezident İlham Əliyevin 19 sentyabr 2024-cü il tarixli Sərəncamı ilə “Dövlət Suverenliyi Günü”nün təsis edilməsi xalqımızın tarixi iradəsinin, müstəqillik uğrunda apardığı mübarizənin və əldə etdiyi zəfərin təcəssümüdür.
Tədbirdə məktəblilər vətənpərvərlik mövzusunda şeirlər söyləyib, milli rəqslər ifa ediblər. Məktəbin müəllimi Nuranə Mütəllimova fortepianoda Azərbaycan mahnısı ilə çıxış edib.
Tədbirin sonunda Yeni Azərbaycan Partiyasının üzvü, təqaüdçü müəllim Qulam Kərimov təşəkkürnamə ilə təltif olunub.
