Bakıda məktəblərin qarşısında sürətin 30 km/saata endirilməsi təklif edilir – VİDEO
Məktəbətrafı yollarda sürət həddinin aşağı endirilməsi təklif olunur. Bu haqda mektebgushesi.az ARB Xəbər-ə istinadən məlumat verir.
Sürücülər hesab edirlər ki, dərslərin başlama və bitmə saatlarında məktəblərin ətrafında yaranan tıxac sürəti azaltmağa onsuz da məcbur edir, yəni təklif əksini qanunda tapsa, dəyişiklik yalnız nişanlar üzərində olacaq. Amma mütəxəssislər əksini deyirlər.
Mövcud təhlükə riskini aradan qaldırmaq üçün məktəbətrafı yollarda sürət həddinin saatda 30 kilometrə endirilməsi ən düzgün variant hesab edilir.
Mütəxəssislərin sözlərinə görə, avtomobillərin çox olduğu dünya ölkələrində bu üsul uzun illər öncə sınaqdan keçirilib və hazırda da tətbiq edilməkdədir. Hətta sürətin aşağı salındığı küçə və prospektlərdə aparılan təhlillər zamanı məlum olub ki, qəza halları 50 faiz, ölüm riski 98 faiz azalıb.
“Belə bir təklifin olması normal qarşılanmalıdır. Böyük məktəbləri götürsək belə, onların ətrafındakı həmin o məhdudiyyət zonaları bir neçə yüz metr olur. Həmin məsafədə sürətin 30 km/saata endirilməsi heç kimin nə işini pozan deyil, nə də xüsusi bir problem yaradan deyil. Sadəcə bu, diqqətli olmağa bir çağırışdır”, – nəqliyyat üzrə ekspert Ərşad Hüseynov deyib.
Məsələ ilə bağlı Baş Dövlət Yol Polisi İdarəsinin rəsmisi Mübariz Ağayev də bildirdi ki, məktəbətrafı yollarda sürətin 30 km/saata endirilməsi müsbət qarşılanmalıdır. O ki qaldı təklifin reallaşmasına, bunun üçün ilk olaraq bəzi qurumlarla danışıqlar aparıb lazımi tədbirlər görülməlidir.
