"Hesab edirəm ki, özünü doğruldub-doğrulmaycağından asılı olmayaraq hər hansı proqnoza deyil, rəsmi məlumatlara istinad etsək, daha düzgün olar”.
Bu sözləri Təhsil Nazirliyi yanında İctimai Şuranın sədr müavini və təhsil eksperti Nadir İsrafilov deyib.
O, insanları rəsmi xəbərlərə inanmağa çağırıb.
"Təhsil Nazirliyi tərəfindən dəfələrlə insanların yalnız rəsmi mənbələrin məlumatlarına inanmaq çağırışlarına baxmayaraq, yenə də yuxarı sinif şagirdləri üçün orta məktəblərdə tədrisin mayın 10-dan başlanılacağı, yay aylarında tədrisin davam edəcəyi, müəllimlərin yay tətilinin qısaldılacağı barədə söhbətlər dolaşır, "Virtual məktəb” layihəsinə qoşulmayan müəllimlərə maaş verilməyəcək və s. və i.a kimi fikirlər səsləndirilir. Halbuki, mövcud şəraitdə nəinki yanlış məlumat, subyektiv fikir, hətta konkret təklif, qeyri-rəsmi açıqlama belə əhalinin müəyyən dairələri tərəfindən həqiqət kimi qəbul edilə bilər və cəmiyyətdə müəyyən çaşqınlıq yaradar. Sosial mediada bu kimi hallara yol verilməsinin az şahidi olmamışıq. Hesab edirəm ki, özünü döğruldub-doğrulmaycağından asılı olmayaraq hər hansı proqnoza deyil, rəsmi məlumatlara istinad etsək, daha doğrusunu etmiş olarıq”.
Təhsil eksperti "Virtual məktəb” layihəsindən də söz açıb.
"Distant təhsillə əlaqədar olaraq "Virtual məktəb”in yaradılması, teledərslərin keçirilməsi, müəllimlərin "zoom” proqramı ilə dərslərini davam etdirməsi təhsil adına müsbət addım hesab edilsə də, bunun vəziyyətdən çıxış yolu olmaması, "Müəllimlərin "zoom” proqramı, hətta Vatsap və ya "Virtual məktəb” vasitəsilə keçdikləri dərslərə hər şagirdin qoşula bilməməsi, qoşulsalar belə, çoxu bu cür dərs formasına adət etmədiyindən çətinliklə üzləşməsi, bizdə distant təhsil ənənəsi olmadığından lazımi effekt verməməsini deyənlər də var.
Bəli vermir və verə də bilməz, çünki biz belə vəziyyətlə ilk dəfə rastlaşırıq və vəziyyətdən çıxış yolu kimi bütün mövcud imkanları sınaqdan çıxarmalıyıq. Bu gün lazımi efekt verməz, əvəzində sabah üçün lazımı təcrübə qazanmağımıza zəmin yaradar. İstəsək də, istəməsək də razılaşmaq zorundayıq ki, bu gün virtual məkana transformasiya, sabah real aləmə keçidin təminatıdır. Əks təqdirdə, belə çıxmırmı ki, məsafədən tədris özünü lazımınca doğrultmur deyə, qollarımızı sallayıb boş oturmalıyıq...?”.
Nadir İsrafilov tədris iliylə bağlı məsəyəyə aydınlıq gətirib.
"Məlum olduğu kimi, fövqəladə hadisələrlə bağlı (hərbi vəziyyət, zəlzələ, daşqın, kütləvi xəstəlik və s.) respublikanın bütün ərazisində tədris ilinin müddətində və tətil günlərində dəyişikliklər barədə Nazirlər Kabinetinin 24 fevral 2020-ci il tarixli 66 nömrəli qərarı var. O da birmənalı qəbul edilməlidir ki, mövcud vəziyyətlə bağlı bütün rəsmi məlumatlar Operativ Qərargaha istinadən verilir.
Nazirlər Kabineti yanında Operativ Qərargahın keçirdiyi son mətbuat konfransında isə Mətbuat Xidmətinin rəhbəri bəyan edib ki, bu gün təhsil və tədrisin nə zaman bərpa olunacağı barədə danışmaq tezdir, bu məsələ aktiv müzakirədədir: "Təhsil və tədrisin bərpa olunması hər zaman gündəlikdədir və müzakirə olunur. Biz hələ virusa qalib gəlməmişik. Bu hələ qeyri-müəyyənlikdə qalır. Bu, bizdən asılı olan məsələ deyil”.
O, Təhsil Nazirliyinin bu istiqamətdə həyata keçirdiyi tədbirlərdən söz açıb.
"Baxmayaraq ki, Təhsil Naziri Ceyhun Bayramovun da hamının arzu və iradəsini ifadə etdiyi kimi "təhsil sistemində çalışan hər kəsin arzusu yenidən ənənəvi işinə qayıtmaqdır” - bununla belə bu, hələ ki, tam reallaşması yaxın günlərdə olmasa da, hər halda yaxın həftələrdə, ən uzağı yaxın aylarda reallaşması mümkün olan haldır. Belə bir qənaətə gəlmək üçün isə hər cür əsasımız var. Nəzərə alsaq ki, bir neçə ölkədə və əyalətlərdə artıq tədrisə başlamaq imkanları reallaşır, bizdə isə vəziyyət digərlərindən daha əminli və etibarlıdır.
Çünki, hər kəsə aydındır ki, yaranmış vəziyyətdən mümkün qədər zərərsiz çıxmaq üçün dövlətimiz tərəfindən lazım olan bütün qabaqlayıcı addımlar atılıb, kompleks və məqsədyönlü tədbirlərin həyata keçirilməsi davam etməkdədir. Təhsil Nazirliyi də öz növbəsində təhsilimizin dayanıqlılığını və davamlılığını saxlamaq üçün bütün mümkün olan imkanlardan lazımınca istifadə edir. Yəni, müəyyən prosedurlar nəzərə alınmazsa, təhsilimizlə bağlı nəsə elə də ciddi bir problem yaranacağı istisna olunur. Lakin tədrisə tam və ya regionlar üzrə mərhələli başlamaq üçün kəskin respirator virus infeksiyasının bitməsi, ən azından kəskin azlması lazımdır.
Təhsil Nazirliyi yanında İctimai Şura olaraq məsafədən əlaqələrin təşkili, istifadə olunan resurslar və prosesin gedişi barədə sualları cavablandırmaq üçün teams.microsoft.com.proqramına qoşulmuşuq. Hamımız bir nəfər kimi təhsildə maraqlıyıq və dövlətimizin vəziyyəti tam nəzarətdə saxladığının bilavasitə şahidiyik. Tədrisə start veriləcəyi və ya müddətin növbəti dəfə uzadılacağını səbrsizliklə gözlədiyimiz rəsmi məlumatın elan ediləcəyi saata və ya günə isə o qədər də çox qalmayıb”.
Qeyd edək ki, tədris ilinin uzadılması məsələsi hələ ki, müzakirə edilir.
azedu.az
