"Ekoloji baxımdan məktəb avtobuslarının istifadəsi böyük üstünlüklər vəd verir"

“Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı”na əsasən ümumi təhsil və məktəbəqədər təhsil müəssisələrində təhsil alanların rahat və təhlükəsiz daşınması məqsədilə “məktəb avtobusları”ndan istifadənin təşkili nəzərdə tutulur”.

AzTehsil.com xəbər verir ki, bunu  açıqlamasında Milli Məclisin deputatı Müşfiq Cəfərov deyib.

O bildirib ki, Azərbaycanda məktəb avtobuslarının istifadəyə verilməsi təhsil və nəqliyyat sahəsində yaxşı mənada ciddi dəyişikliklərə səbəb olacaqdır:

“Bu sistemin tətbiqi bir neçə mühüm aspektdə müsbət təsir göstərəcəkdir. Xüsusilə şagirdlərin təhlükəsizliyi, nəqliyyat sıxlığının azaldılması, həmçinin bu valideynlər üçün də əlavə rahatlıq olacaqdır. İnkişaf etmiş ölkələrin təcrübəsi göstərir ki, məktəb avtobuslarının tətbiqi həm şagirdlərin rahatlığına, həm də şəhər infrastrukturunun daha səmərəli işləməsinə xidmət edir. İbtidai və orta məktəb şagirdləri üçün bu sistem vacibdir, çünki onlar fərdi nəqliyyat vasitələrindən və ya ictimai nəqliyyatdan tək istifadə edə bilmirlər. Əslində şagirdlərin valideyinlər tərəfindən fərdi avtomobillərlə məktəbə aparıb-gətirilməsi şəhər nəqliyyatında sıxlıq və xaos yaratdığından məktəb avtobuslarının əhəmiyyətinin vacibliyini bir daha göz önünə gətirir”. 

Millət vəkili qeyd edib ki, avtobuslar xüsusi marşrutlarla hərəkət etdiyindən şəhərdə tıxacda azalacaq, məktəblilər də vaxt itirməmiş olacaqdır:

“Elə ekoloji baxımdan da məktəb avtobuslarının istifadəsi böyük üstünlüklər vəd verir. Şəhər daxilində fərdi avtomobillərin çox olması təkcə tıxac yaratmır, həm də havanın çirklənməsinə səbəb olur. Şəxsi avtomobillərlə müqayisədə məktəb avtobusları daha çox şagirdi eyni vaxtda daşıdığından ekoloji tarazlığı da qorunacaqdır. Bu yanaşma xüsusilə inkişaf etmiş ölkələrdə tətbiq edilir və şəhər ekosisteminin gündən günə yaxşılaşmasına gətirib çıxardığı da müşahidə olunur”