“Universitetlər boş plan yerləri ilə baş-başa qalıb"

“Magistratura formal pilləyə çevrilib” - 3300 yer boş qalıb.“Universitetlər boş plan yerləri ilə baş-başa qalıb, magistratura formal pilləyə çevrilib”

AzTehsil.com xəbər verir ki, bu fikirləri təhsil sahələri üzrə ekspert Kamran Əsədov özünün Feysbuk hesabında bildirib.

Ekspert qeyd edib ki, bu il magistraturaya qəbul nəticələri ali təhsilin planlaşdırılmasında ciddi problemlərin olduğunu bir daha üzə çıxarıb:

“Magistratura pilləsinə ixtisas seçimi edən 15 min 555 nəfərdən 13 min 446 nəfəri qəbul olunub. Amma bu rəqəmlərin arxasında çox acı bir reallıq var: ümumilikdə 16 min 794 plan yeri ayrılıb, lakin 3 min 300-dən çox plan yeri boş qalıb! Bu nə deməkdir? Deməkdir ki, universitetlər ehtiyacdan artıq magistr planı veriblər. Bu yerlər üçün nə tələbə var, nə də maraq. Nəticədə həm universitetlər maliyyə itirir, həm də az tələbə ilə formalaşan qruplarda tədrisin keyfiyyəti ciddi şəkildə zəifləyir. Bu, həm təhsilalanlara, həm də təhsilverənlərə zərbədir”.

26 min 241 bakalavrdan 3 min 147 nəfəri 0–30 bal arası nəticə göstərib

Kamran Əsədov builki imtahan nəticələrinə də toxunaraq narahatlıq doğuran statistikanı diqqətə çatdırıb:

“Bu il imtahanda iştirak edən 26 min 241 bakalavrdan 3 min 147 nəfəri 0–30 bal arası nəticə göstərib. Bu, onu göstərir ki, imtahanda verilən suallar universitetlərdə keçilən biliklərə əsaslanmır. O zaman bu sualları kim hazırlayır, hansı əsasla? Universitetlərdə verilən təhsil niyə bu imtahanda “keçərli” sayılmır? Bunu kim izah edəcək? Dövlət İmtahan Mərkəzi? Elm və Təhsil Nazirliyi?”

5 min 798 nəfər dövlət sifarişi ilə, amma 7 min 648 nəfər ödənişli əsaslarla oxuyacaq

Ekspert həmçinin qeyd edib ki, qəbul olunanların böyük hissəsi təhsili ödənişli əsaslarla davam etdirəcək:

“Qəbul olunanlardan 5 min 798 nəfər dövlət sifarişi ilə, amma 7 min 648 nəfər ödənişli əsaslarla oxuyacaq. Ödənişli təhsilin bu qədər yüksək olması həm sosial bərabərliyi pozur, həm də keyfiyyətsiz və kommersiya maraqlı bir sistemin davam etdiyini göstərir”.

Kamran Əsədov sonda vurğulayıb ki, magistratura pilləsi məqsəddən uzaqlaşıb və formal bir mərhələyə çevrilib. Onun fikrincə, bu vəziyyətə Elm və Təhsil Nazirliyi nəzarət etməlidir.