Bu şəxslər yüksək bal toplaya biləcək

Kimlər 700 bal toplaya biləcək? - Bu şəxslərin şansı DAHA ÇOXDUR.

“Dövlət İmtahan Mərkəzi (DİM) dəfələrlə vurğulayıb ki, qəbul imtahanlarının birinci və ikinci mərhələlərində sualların çətinlik səviyyəsi eyni olur. Bu ənənə bu il də davam etdiriləcək”.

AzTehsil.com- n əldə etdiyi məlumata görə, bu fikirləri təhsil məsələləri üzrə ekspert Rizvan Fikrətoğlu  açıqlaması zamanı bildirib. Ekspertin fikrincə, nadir hallarda da olsa, sualların çətinlik səviyyəsində 10 faizə qədər fərq müşahidə edilə bilər:

“Yəni suallar əvvəlki mərhələyə nisbətən 10% daha asan və ya çətin ola bilər. İkinci cəhddə də bu cür fərq baş verə bilər.

Məsələn, üçüncü ixtisas qrupu üzrə keçirilmiş birinci cəhd zamanı tarix fənnindən bəzi sualların konkret və aydın cavabının olmaması abituriyentlər arasında narazılığa səbəh olmuşdu. Eyni zamanda, riyaziyyat fənnindən də anlaşılmaz suallara rast gəlmək mümkün idi. İkinci cəhddə isə bu cür müəmmalı sualların verilməsi ehtimalı azdır”.

“700 bal toplamaq mümkündürmü?” sualına gəldikdə isə, bəli düşünürəm ki ola bilər:

“Xüsusilə də buraxılış imtahanında yüksək - 300 bala yaxın nəticə göstərmiş abituriyentlərin 700 bal toplamaq şansı kifayət qədər yüksəkdir. Bu baxımdan, ikinci cəhddə maksimum nəticə göstərən abituriyentlərin olması mümkündür”.

O həmçinin vurğulayıb ki, adətən prestijli ixtisaslar üzrə keçid ballarında artım müşahidə olunur:

“Bu il də üçüncü ixtisas qrupu üzrə bəzi nüfuzlu ixtisaslarda 3–5 bal arası artım baş verə bilər. Bununla yanaşı, texnoloji istiqamətli ixtisaslar – o cümlədən informasiya təhlükəsizliyi, kompüter elmləri, kompüter mühəndisliyi və digər mühəndislik sahələrində də keçid ballarında müəyyən artım gözlənilir”.

Ekspertin sözlərinə görə, eyni zamanda, bəzi mühəndislik ixtisaslarında xüsusilə az seçilən ixtisaslarda da azalma müşahidə oluna bilər:

“Qeyd edək ki, hələ ikinci mərhələ, yəni ixtisas qrupları üzrə blok imtahanları keçirilməyib. Bu səbəbdən keçid ballarında hansı istiqamətdə dəyişikliklərin olacağı ilə bağlı dəqiq proqnoz vermək hələlik mümkün deyil. Statistik məlumatlar yalnız imtahanlar yekunlaşdıqdan sonra tam şəkildə müəyyənləşəcək”, - deyə R.Fikrətoğlu bildirib.