Təqaüd proqramı ilə bağlı təşəbbüslər artmalıdır- NAZİR
Qadının təhsili onun daha bacarıqlı, daha güclü formalaşması üçün ən mühüm amillərdən biridir. Qızların təhsilinə diqqət yetirmək uzunmüddətli sosial və iqtisadi inkişafın əsas səbəblərindəndir. Bu həm ailə münasibətlərinə, həm də cəmiyyətin ümumi rifahına birbaşa təsir edir.
AzTehsil.com xəbər verir ki, bunu elm və təhsil naziri Emin Əmrullayev “Gənc qızların təhsilinə dəstək” layihəsinin məzun günündə çıxışı zamanı deyib.
O bildirib ki, təhsilin bütün pillələrində qızların iştirakının təmin olunması əsas prioritetlərdəndir:
“Görüləcək işlər çoxdur, amma bu sahədə atdığımız hər bir addım mühümdür. Leyla Əliyevaya təşəkkür edirəm. Azərbaycanda erkən nikahların qarşısının alınması və qadınların inkişafına dəstək göstərilməsi kimi təşəbbüslər cəmiyyətimizə əsaslı təsir göstərir.
Artıq layihənin 4 ili tamam olur. Təqaüd proqramları ilə bağlı təşəbbüslər çoxalmalıdır. Ali təhsil müəssisələrimiz üçün yardım etmə mədəniyyəti və xeyriyyəçilik ənənələrinin bərpası baxımından bu layihənin xüsusi əhəmiyyəti var”.
