Qubada “Zorakılığa qarşı susma” adlı tədbir KEÇRİLİB
Quba filialının müəllimi və tələbələri “Zorakılığa qarşı susma” adlı tədbirdə iştirak ediblər.
AzTehsil.com xəbər verir ki, Son zamanlarda dövlətimiz tərəfindən İnsan hüquqlarının tərkib hissəsi olan qadın və uşaq hüquqları, gender bərabərliyi sahəsində milli qanunvericiliyin təkmilləşdirilməsi və yeni normativ hüquqi aktların qəbul edilməsi bu sahələrdə müsbət nəticələrin əldə edilməsinə səbəb olmuşdur. Ölkəmizin “Qadınlara qarşı ayrı-seçkiliyin bütün formalarının ləğv olunması haqqında”, qadın və uşaq hüquqları sahəsində dövlət siyasətinin formalaşması, normativ hüquqi bazanın təkmilləşdirilməsi, “Gender (kişi və qadınların) bərabərliyinin təminatları haqqında” və “Məişət zorakılığının qarşısının alınması haqqında” Azərbaycan Respublikası qanunlarının qəbul edilməsi və institusional islahatlar bu istiqamətdə atılan mühüm addımlardır. Qadınların cəmiyyətin bütün sahələrində fəallığının artırılması, uşaq problemlərinin həllinin önə çəkilməsi istiqamətində görülən işlər, siyasi, iqtisadi və sosial sahələrdə gender bərabərliyi amilinə daha çox əhəmiyyət verilməsi insan hüquqlarının qorunmasına öz bəhrəsini verməkdədir. Lakin təcrübə göstərir ki, fundamental insan hüquqlarının məhdudlaşdırılması və pozulması halları, zorakılıq, o cümlədən cinsi mənsubiyyətə görə zorakılıq halları cəmiyyətin aşkar mənfi münasibətinə və dözümsüzlüyünə, habelə son illərdə Azərbaycan Respublikasının həyata keçirdiyi təsirli tədbirlərə baxmayaraq, dünyanın bir çox ölkələrində olduğu kimi, ölkəmizdə də problem olaraq qalmaqdadır. Məhz bu baxımdan zorakılığın bütün növlərinin qarşısının alınması istiqamətində görülən işlərin səmərəliliyini artırmaq, gender zorakılığı ilə mübarizə sahəsində dövlət orqanlarının zorakılığın bütün növlərinə qarşı birgə fəaliyyət göstərməsi ərək məişət zorakılığına qarşı mübarizə tədbirlərinin əsas hissəsini təşkil edir.
Bununla bağlı olaraq 5 dekabr 2025-ci il tarixdə Quba Rayon İcra Hakimiyyətinin və Quba rayon Heydər Əliyev Mərkəzinin birgə təşkilatçılığı, Quba-Xaçmaz Regional Təhsil İdarəsinin Quba rayonu üzrə təhsil sektorunun, Azərbaycan Respublikasının İnsan Hüquqları üzrə Müvəkkilinin (Ombudsmanın) Şimal regional mərkəzinin, ADPU-nin Quba filialının tərəfdaşlığı ilə “Gender əsaslı zorakılığa qarşı 16 günlük fəallıq”, 25 noyabr (Qadınlara qarşı Zorakılıqla Beynəlxalq Mübarizə Günü) -10 dekabr (Beynəlxalq İnsan Hüquqları Günü) tarixləri arasında keçirilən beynəlxalq kampaniya çərçivəsində “Zorakılığa qarşı susma” adlı tədbir keçirilmişdir.
Tədbirdə rayon ictimaiyyəti ilə yanaşı Filialın THİK sədri, Ümumi fənlər kafedrasının baş müəllimi Aygün Şıxbabayeva və filialın gənc fəalları Xədicə Orucova, Əzimə Ömərzadə, Yeganə Quliyeva, Əli Muradov da iştirak etmişlər.
