“Bəzi universitetlər 70-80 yaşlı müəllimlərə möhtac qalıb”
Universitetlərdə dərs deyən bir sıra müəllimlər hələ də dərs saatlarında səhifələrlə mühazirə yazdırmağa davam edirlər.Texnologiyanın sürətlə inkişaf etdiyi müasir dövrdə bunun nə dərəcədə aktual olub-olmaması isə ciddi sual doğurur.
AzTehsil.com xəbər verir ki, AzEdu.az-a açıqlama verən təhsil jurnalisti Məzahir Məmmədli məsələ ilə bağlı fikirlərini bölüşüb:O, qeyd edib ki, bu gün hələ də auditoriyalarda elə müəllimlər qalır ki, ənənəvi sistemlə, yəni sovet təhsil sistemindən qalma yanaşma ilə, saralmış vərəqlərdən mühazirə oxuyurlar:
"Azərbaycan ali təhsil müəssisələri 2009-cu ildən Bolonya sisteminə qoşulub. Amma biz hələ də həmin standartlara tam uyğunlaşa bilməmişik. Qayıb limiti var, amma əvvəlki ənənəvi tədris metodu hələ də davam edir. Elə hallar olur ki, artıq birinci kurs tələbələri belə, mühazirə deyən müəllimin səviyyəsinə uyğun gəlmir, hətta özünü ondan daha məlumatlı hesab edir”.
Müəllimlərin öz üzərində işləmədiyini vurğulayan ekspert gənclərin universitetdə müəllim kimi qalmaq istəməmələrinə də aydınlıq gətirib:
“Məcburam bunu yenidən vurğulamağa: bəzi müəllimlər öz üzərində işləmirlər. Gənclərimiz isə universitetdə müəllim kimi qalmaq istəmirlər, yeni kadrlar gəlmir. Çünki bu sahədə heç bir stimullaşdırıcı mexanizm yoxdur. Fəlsəfə doktoru adını alan gənclərin faizi nə qədərdir? Ali təhsil müəssisələri yenilənən alimlərin üzərində qurulmalıdır. Amma bu gün universitetlərdə qalaraq işləmək istəyən gənclərimiz yoxdur. Çünki onlara heç bir güzəşt edilmir. Mənzil verilmir, aldıqları əməkhaqqı ilə ailə dolandırmaq mümkün deyil. Ona görə də artıq bəzi universitetlərimiz 70-80 yaş üzərində olan müəllim-professor heyəti ilə işləməyə davam etməkdə məhkumdurlar”.
Ekspertin fikrincə digər pis tərəf isə tələbəni bu mühazirələri yazmağa məcbur etməkləridir:
“Artıq mühazirənin bir hissəsini dinlədikdən sonra müəyyən resurslardan istifadə etməklə həmin dərsə bəlkə də müəllim deyəndən daha keyfiyyətli hazırlaşa bilərlər. Müəllim isə birmənalı şərt qoyur ki, mən oxuduğum məhdud mühazirəni gəl, mənə danış və beləcə qiymətini al”.
