Universitetə qəbul olmaq istədi, dələduzluğa məruz qalıb
Universitetə qəbul olmaq istəyən şəxs dələduzluqla üzləşib.
AzTehsil.com xəbər verir ki, Leyla Qulamova (soyadı şərti) universitetə qəbul olmaq üçün tanışı Səmra Gözəlovaya (soyadı şərti) müraciət edib. O isə 10 000 manat müqabilində məsələni həll edə biləcəyini deyib. Sonda tərəflər 7 000 manata razılaşıblar.
Lakin Səmra verdiyi vədi yerinə yetirməyib. Həmçinin hər dəfə bir bəhanə ilə Leylanın pulunu qaytarmaqdan yayınıb.
Qarşı tərəf məcbur qalaraq polisə müraciət edib. Səmra saxlanılıb və ona Cinayət Məcəlləsinin 178.2.4-cü (dələduzluq - xeyli miqdarda ziyan vurmaqla törədildikdə) maddəsi ilə ittiham elan edilib. Cinayət işinə Səbail Rayon Məhkəməsində baxılıb.
Səmra məhkəmə zamanı verilmiş ittiham üzrə özünü təqsirli bilməyib. O bildirib ki, Leylaya qarşı dələduzluq etmək niyyəti olmayıb. Pulu da işi düzəltmək üçün başqasına verib. Həmçinin məlum olub ki, tərəflər arasında artıq barışıq əldə olunub.
Məhkəmənin hökmü ilə Səmraya 1 il 9 ay müddətinə azadlığın məhdudlaşdırılması cəzası təyin edilib.
