Quba Filialı ilə Özbəkistanın pedaqoji bacarıqlar mərkəzləri arasında protokol imzalanıb
Pedaqoji Universitetin Quba Filialı ilə Özbəkistanın pedaqoji bacarıqlar mərkəzləri arasında niyyət protokolu imzalanıb.
AzTehsil.com xəbər verir ki , Azərbaycan Dövlət Pedaqoji Universitetinin Beynəlxalq əlaqələr üzrə prorektorluğunun dəstəyi və yardımları sayəsində Azərbaycan Dövlət Pedaqoji Universitetinin Quba filialının strateji inkişaf və beynəlmiləlləşmə siyasətinin tələbləri əsasında yeni əməkdaşlıq əlaqələri qurulur.
Belə ki, ADPU-nun Quba filialı ilə Özbəkistan Respublikasının Məktəbəqədər və Məktəb Təhsili Nazirliyinin tabeliyindəki bir neçə pedaqoji bacarıqlar mərkəzləri arasında əməkdaşlıq əlaqələrini xarakterizə edən niyyət protokolları imzalanıb.
ADPU-nun Quba Filialı ilə Özbəkistanın Nəvai, Səmərqənd və Surxandərya vilayətlərinin eyni funksiyalı qurumları arasında əməkdaşlıq əlaqələrinin genişlənməsini təmin edəcək niyyət protokollarında kadrların pedaqoji bacarıqlarının artırılması üçün birgə təlimlərin keçirilməsini, həmçinin bəzi elmi-tədqiqat işlərinin birgə hazırlanmasını nəzərdə tutan prinsiplər 11 maddədə əksini tapmışdır.
2025-ci ilin oktyabrın 18-də bu münasibətlə Azərbaycan Dövlət Pedaqoji Universitetinin Quba filialının akt zalında adı çəkilən qurumların rəhbərlərinin iştirakı ilə imzalanma mərasimi təşkil olunub.
İmzalanma mərasimindən sonra tərəflər arasında geniş tərkibli görüş keçirilmişdir. Görüş Azərbaycan Respublikasının Prezidenti İlham Əliyevin və Özbəkistan Respublikasının Prezidenti Şavkat Mirziyoyevin liderliyi ilə iki qardaş ölkənin müxtəlif istiqamətli əlaqələrinin inkişaf etdirilməsi, xüsusən təhsil sahəsində qazanılan uğurların təhlili və qarşıda duran vəzifələrin müzakirəsinə həsr olunub.
Görüşdə özbəkistanlı müəllimlər onlara göstərilən diqqət və qayğıdan, keçirilən təlimlərin dəyərindən bəhs edərək öz minnətdarlıqlarını bildirdilər. Əminliklə ifadə olunub ki, gələcəkdə ADPU Quba filialının pedaqogika, həmçinin təhsilin ayrı-ayrı sahələrinə dair təlimlər və seminarlar təcrübəsindən davamlı şəkildə istifadə olunacaq.
