Dolaşıq suallarla aparılan müsahibələr-ŞƏRH

 Son günlər sosial şəbəkələrdə müəllimlərə müsahibələrdə verilən suallar müzakirə edilir, Müsahibədə  iştirak  edənlər bu sualları şəbəkədə ictimailəşdirirlər. Bu normal haldır, fikir mübadilədi aparılır.  

Müsahibə sualların qoyuluşunda və məzmununda xeyli ciddi səhvlər var. 

Məsələn:  

Müsahibə sualı 1.   Siz şagirdlərə dərsi necə tədris edərsiz ki, hər bir şagird individual olaraq dərsi anlasın ? Nəzərə alsaq ki, hər bir şagird müxtəlif dünyagörüşü və fərqli mühitdən gəlir.

Bu sualı verən heç özü də yəqin ki, bunun cavabını bilmir. Bu nə MİQ, nə sertifikasiya sualı  ola bilməz. Bu ciddi elmi tədqiqat mövzusudur. Müəllimə müsahibə mərhələsində belə sual ünvanlamazlar. 

Bunu praktik olaraq ənənəvi metodlarla etmək mümkün deyil. Sözdə çox şey demək olar. Bunun üçün adaptiv öyrədici sistemlər və müvafiq kontent hazırlamaq lazımdır. İndi dünya təhsil sistemi süni intellektdən istifadə etməklə  bu istiqamətdə çalışır.

Bu suala cavab almaq üçün illərlə tədqiqat aparılmalıdır, ən azı  10-15 sayda 100 minlik qrant verilməlidir bu araşdırmalara. Yoxsa ,  mənasız ictimai fəallıq mövzusunda qrantlar  yox, məhz belə elmi-praktik mövzuda müsabiqələr aparmaq lazımdır. Əgər suallara düzgün cavab axtarılırsa, belə araşdırmaları dost tanışa yox, elm adamlarına yönləndirmək lazımdır. 

Müsahibə sualı 2:

Şagirdlərin tədrisində hansı boşluqları görürsüz və bunu necə aradan qaldırarsız ?

Bu halda da sualın qoyuluşu düz deyil.

"Şagirdlərin tədrisində..."   ola bilməz. 

Tədris edilən fənn olur, məzmun olur, şagird yox.

Zənn edirəm ki, bütün müsahibə suallarının monitorinqi aparılsa, çox belə dolaşıq suallar ortaya çıxacaq. 

Hər dəfə  təhsil menecerlərinin belə naşılığını görəndə əsl təhsil mütəxəssisləri  dəhşətə gəlir.

Dosent İlham Əhmədov