Süni İntellekt Akademiyasının yaradılması bu peşələr üzrə ixtisarlara səbəb olacaq
Süni İntellekt Akademiyasının yaradılması bu peşələr üzrə ixtisarlara səbəb olacaq.
"Süni İntellekt Akademiyasının yaradılması kinorejissorluq, mühasibatlıq, data analitika, istehsalatda proseslərin avtomatlaşdırılması, sərnişin daşımada sürücülərin fəaliyyəti, satıcı, kassir işləri, jurnalistikanın özündə də kütləvi ixtisarların olacağından xəbər verir. Hətta, gələcəkdə tədris prosesində də dərslər süni intellekt vasitəsi ilə tədris olunacaq. Kütləvi müəllimlik fəaliyyətinə də təhdid kimi qəbul edə bilərik".
Bu fikirləri açıqlamasında təhsil eksperti Elçin Əfəndi Prezident İlham Əliyevin bu gün imzaladığı “Azərbaycan Respublikasının 2025–2028-ci illər üçün süni intellekt Strategiyası”nın təsdiq edilməsi haqqında Sərəncamla yaradılacaq Süni İntellek Akademiyasının əhəmiyyətindən danışarkən bildirdi.
AzTehsil.com xəbər verir ki, o, əlavə etdi ki, daha öncədən qərarla bağlı tapşırıqlar verilib:
"Son illərə nəzər yetirsək İKT sahəsində daha çox tələbə təhsilə önəm verməyə başlayıb. Bu, digər ixtisasların rəqabətdə geridə qalmasını göstərir. Dünyanın inkişaf etmiş digər ölkələrində süni intellekt sahəsində müəyyən strategiyalar hazırlanır. Bu, fiziki fəaliyyətlə məşğul olan şəxslərin əvəzlənməsi deməkdir".
Elçin Əfəndi Elm və Təhsil Nazirliyininin qarşına qoyulan tələblərdən söz açdı:
"Süni intellekt sahəsində kadr hazırlığının həyata keçirilməsində ali təhsil müəssisələrində beynəlxalq araşdırmalar aparılıb. Süni intellektin inkişafında rol oynayan dünya reytinqli 10 ölkənin ən azı 3-ü ilə əməkdaşlığa başlanılıb, inkişaf etmiş universitetlərdən bəzi kadrlar cəlb olunub. Rəqəmsal məktəb layihəsi ilə bağlı Elm və Təhsil Nazirliyi tərəfindən də açıqlama verildi. Növbəti tədris ilindən təhsil müəssisələri bu layihəyə qoşulacaq. Bu, özlüyündə təhsilin rəqəmsallasması anlamını daşıyacaq. Təməl biliklər aşağı siniflərdən şagirdlərə aşılanmalıdır. Akademiyanın yaradılması müasir dövrün ehtiyacıdır. Çünki süni intelekt sahəsində ixtisaslaşmış konkret ali təhsil müəssisəsi yoxdur. Bu o demek deyil ki, başqa universitetlərin hazırladığı kadrlar burada çalışmamalıdır. Digər universitetlərdə kompüter elmləri, İT sahəsində təhsil alanların da bilik və bacarıqlarından istifadə olunacaq. Müəyyən özəl sahibkarlıq subyektləri də var ki, məhz, onlar bu istiqamətdə kadr hazırlığı həyata keçirərsə, ölkənin iqtisadiyyatına müsbət töhvələrini verər".
