Təhsil eksperti iqtisadçı ekspertin Təhsil Nazirliyinə ünvanlanan təkliflərinə münasibət bildirdi

Təhsil eksperti Nadir İsrafilov iqtisadçı alim Qubad İbadoğlunun Təhsil nazirliyinə ünvanladığı təkliflərə münasibət bildirib.

Hesab edirəm ki, təhsilimizin inkişafına və daha da təkmilləşdirilməsinə yönəlik irəli sürülən və əsaslandırılan istənilən təklif ümumi ictimai rəyin öyrənilməsi və ümumi məxrəcə gəlinməsi baxımından son dərəcə vacibdir. Bu kimi təkliflər təhsilimizin daha da yeniləşdirilməsi istiqamətində beynəlxalq təhsil sisteminə inteqrasiya baxımından da faydalı ola bilər. Digər vacib məqamlardan biri də ondan ibarətdir ki, əgər təklif əlaqədar sahənin peşəkar mütəxəssisi tərəfindən irəli sürülürsə.

Təəssüf ki, bu qəbildən olan təkliflərə o qədər də tez-tez təsadüf etmirik, baxmayaraq ki, Azərbaycan Respublikası vətəndaşlarının dövlət idarəetməsinin həyata keçirilməsinə cəlb edilməsi ilə əlaqədar yaranan münasibətləri tənzimləyən, ictimai əhəmiyyətli qərarların qəbulu zamanı müvafiq məsələlər barəsində əhalinin müxtəlif təbəqələrinin təkliflərinin hazırlanması üçün aidiyyəti dövlət və yerli özünüidarəetmə orqanlarının səlahiyyətli nümayəndələrinin, vətəndaş cəmiyyəti institutlarının nümayəndələrinin, ayrı-ayrı vətəndaşların, mütəxəssis və ekspertlərin iştirakının təmin edilməsini nəzərdə tutan "İctimai iştirakçılıq haqqında” Qanun belə qəbul etmişik.

Bu baxımdan təkcə ölkəmizdə deyil, onun hüdudlarından kənarda da tanınmış iqtisadçı – alim Qubad İbadoğlunun Təhsil nazirliyinə ünvanladığı təkliflərı movcüd təhsil sistemi çərçivəsində, işləmə mexanizmləri, standartları, normativ aktların bir daha nəzərdən keçirilməsi baxımından diqqətdən kənar qala bilməz. Əbəs yerə deyil ki, sosial şəbəkələrdə bu təkliflər istifadəçilərin böyük marağına səbəb olmuş və geniş müzakirə obyektinə çevrilmişdir.

Məktəblər arasında aparılan informatika yarışmasının qalibi olan 100 istedadlı və yaradıcı şagird üçün xüsusi qruplar təşkil edilməsi, orta məktəblərin wi-fi ilə təmin olunması, Həmin məktəblərin şagirdlərinə fərdi email hesabları açılması, ixtisaslar üzrə dünya reytinqində ilk 100-lükdə təhsil alan bakalavr, magistr, doktorluq proqramı tələbələrinin ödəniş haqlarının dövlət tərəfindən qarşılanması və onlara yaşadığı ölkənin yaşayış minimumu və dərs vəsaitləri ilə təminat xərci nəzərə alınmaqla fərdi təqaüdlər verilməsi təklifləri ilə bərabər, professorun xaricdə təhsil almaq imkanı qazanan bütün vətəndaşlarının təhsil xərclərinin dövlət hesabına qarşılanması, beynəlxalq, regional olimpiadaların qaliblərinə xaricdə təhsil üçün dövlət təşviqi mexanizminin yaradılması, dövlət xətti ilə tələbələri xaricdə təhsil almağa göndərərkən universitetlər deyil, ixtisasların əsas götürülməsi kimi təklifləri də diqqətçəkən olub, ümumi işimizin xeyrinə ola bilər. Düzdür bu təkliflərin böyük hissəsinin reallaşdırılması müəyyən maliyyə vəsaitəri tələb edir. Bununla belə təhsilə çəkilən heç bir xərc itmir. İstənilən halda dövlətin müdaxiləsinə ehtiyac var. Əlbəttə heç də istisna olunmur ki, ilkin olaraq Təhsil nazirliyi bu ünvanlı təklifləri diqqətlə nəzərdən keçirsin, razılaşdırma yolu ilə məqbul hesab etdiyi müddəalar əsasında hökumətə öz konkret təkliflərini versin.