"Milli kimlik bütün fənlərin tədrisində nəzərə alınmalıdır"
"Qloballaşma dövründə milli kimliyin qorunması təhsil sisteminin əsas prioritetlərindən biri olmalıdır". AzTehsil.com xəbər verir ki, bu sözləri açıqlamasında təhsil eksperti İlqar Orucov deyib.Onun sözlərinə görə, müasir dünyada informasiya axınının sərhəd tanımadığı bir zamanda, gənc nəslin formalaşmasında xarici təsirlər qaçılmazdır: "Bu səbəbdən məktəblərimizdə və ali təhsil müəssisələrində şagird və tələbələrə həm qlobal vətəndaşlıq şüuru, həm də milli-mənəvi dəyərlər eyni vaxtda aşılanmalıdır.Milli kimlik təkcə tarix və ədəbiyyat dərslərində deyil, bütün fənlərin tədrisində nəzərə alınmalıdır. Azərbaycan dilinin düzgün və zəngin tədrisi, mədəni irsimizin təbliği, milli qəhrəmanlarımızın və dəyərlərimizin gənc nəslə tanıdılması bu istiqamətdə mühüm rol oynayır. Gənclər dünya mədəniyyətini tanımaqla yanaşı, öz köklərini və kimliyini də unutmamalıdır. Bunun üçün dərsliklərdə və tədris materiallarında milli məzmunun artırılması, təhsil müəssisələrində vətənpərvərlik yönümlü tədbirlərin keçirilməsi, eləcə də müəllimlərin bu sahədə maarifləndirilməsi vacibdir. Yalnız bu yolla biz qloballaşmanın gətirdiyi fürsətləri dəyərləndirərək milli kimliyimizi müasir dünyada qoruyub saxlaya və inkişaf etdirə bilərik".
