Tələbələrimizlə Fəxr edirik! - REKTOR
“Bu gün 6 mindən çox tələbəmiz məzun olur. Bundan gözəl nə ola bilər? Bakı Dövlət Universiteti (BDU) öz ənənələrinə sadiq qalaraq həm də müasir dövrün ruhunu əks etdirən möhtəşəm məzun günü keçirir. Bu sevinci və həyəcanı hamımız birlikdə yaşayırıq”.
AzTehsil.com xəbər verir ki, bunu BDU-nun məzun günü tədbirində jurnalistlərə açıqlamasında universitetin rektoru Elçin Babayev deyib.
Rektor qeyd edib ki, gündən-günə güclənən Azərbaycan üçün güclü və savadlı yeni nəsil kadrların hazırlanması ən böyük uğurlardan biridir:
“Fəxr edirik ki, məzunlarımız bu gün dövlət strukturlarında, sənaye və biznes sahələrində, Qarabağda və Şərqi Zəngəzurda aparılan quruculuq işlərində fəal iştirak edirlər. Biz bütün məzunlarımızı ürəkdən təbrik edir, onlara gələcək fəaliyyətlərində uğurlar arzulayırıq”.
Reklamınızı SmartBee ilə effektiv edin.
Rektor bildirib ki, 106 il əvvəl 2 fakültə, 44 nəfərlik professor-müəllim və 1094 nəfərlik tələbə heyəti ilə fəaliyyətə başlamış BDU-da hazırda 16 fakültədə 1500 nəfərlik professor-müəllim heyəti çalışır, 25000-dən çox tələbə təhsil alır.
“Universitetdə 120 kafedra, 2 elmi-tədqiqat institutu, 6 elmi-tədqiqat mərkəzi, 5 muzey, Qazax filialı, İqtisadiyyat və Humanitar Kollec və “Gənc istedadlar” liseyi fəaliyyət göstərir. Bakalavr səviyyəsində 75 ixtisas, magistratura səviyyəsində 243 ixtisaslaşma üzrə kadr hazırlığı həyata keçirilir.
Hazırda BDU yüksəkixtisaslı kadrlar yetişdirməklə ölkəmizdə insan kapitalının formalaşmasına və zənginləşməsinə xidmət göstərmək, Vətənimizin dünya elm, təhsil və mədəniyyət məkanında layiqli yer tutmasını təmin etmək kimi ali missiyasını şərəflə yerinə yetirir”.
