UNEC keçmişinə sahib çıxır
UNEC keçmişinə sahib çıxır, bu gününü dəyərləndirir və sabahına ümidlə baxır.
AzTehsil.com xəbər verir ki, ötən gün 1934-1937-ci illərdə UNEC-in 2-ci rektoru olmuş Rəşid Qayıbovun xatirəsini ehtiramla yad edilib.
Rəşid Abdulla oğlu Qayıbov 1889-cu il fevralın 20- də Qazax rayonunun Salahlı kəndində anadan olmuşdur. R.Qayıbov 1916-1920-ci illərdə Qazax Müəllimlər Seminariyasında təhsil almış, sonra Tiflis Kişilər Seminariyasını bitirmiş, 1922-1926-cı illərdə Q.V. Plexanov adına Moskva Xalq Təsərrüfatı İnstitutunda təhsil almışdır. O, Nuxa (indiki Şəki), Ağdam şəhərində təbliğat-təşviqat şöbəsinin müdiri, AK(b)P Kəlbəcər və Şamxor (Şəmkir) Rayon Komitəsinin katibi işləmişdir. Nəhayət, R.Qayıbov 1934-cü ilin aprel ayında Karl Marks adına Azərbaycan Sosial-İqtisad İnstitutunun direktoru vəzifəsinə təyin olunur. 1936-cı ildə Sovet Ticarəti İnstitutunun Karl Marks adına Azərbaycan Sosial- İqtisad İnstitutuna birləşdirilməsi ilə Karl Marks adına Azərbaycan Dövlət Xalq Təsərrüfatı İnstitutu yaradıldı. Rəşid Qayıbov Xalq Təsərrüfatı adı ilə fəaliyyətə başlamış institutun ilk rəhbəri olmuşdur. O, qeyrətli, təəssübkeş azərbaycanlı, qorxmaz və cəsarətli insan olmuşdur. AK(b)P MK-ya ünvanladığı təqdimatında R.Qayıbov Sosial- İqtisad İnstitutunda Tədris və elmi işlər üzrə direktor müavini vəzifəsində çalışan erməni İ.H.Haykazovun üzərinə düşən işin öhdəsindən gələ bilməməsini, elmi və tədris işləri üzrə savadsızlığını, işə biganəliyini, yaramaz bir şəxs olmasını və onun tutduğu vəzifədən azad olunmasını, həmin vəzifəyə isə institutun professor əvəzi Həsənağa Dadaşovun seçilməsini təklif edir. İ.H. Haykazov tutduğu vəzifədən azad edilir və onun yerinə Həsənağa Dadaşov təyin olunur.
1937-ci ilin yazında Rəşid Qayıbov Karl Marks adına Azərbaycan Dövlət Xalq Təsərrüfatı İnstitutunun direktoru vəzifəsindən uzaqlaşdırılır.
Rəşid Qayıbovun guya əksinqilabçı- millətçi təşkilatın üzvü olması haqqında yalan və uydurmaya görə o, təqsirli bilinərək haqqında 1937-ci il oktyabrın 28-də həbs edilir.
1938-ci il iyulun 3-də Rəşid Qayıbov güllələnməyə məhkum olunur və elə həmin gün güllələnir.
Rəşid Qayıbova Allah rəhmət eləsin.
Ehtiramla anırıq...
Hər şey daha da yaxşı olacaq!
