"İKT sahəsində insan kapitalının formalaşdırılması dövlətin prioritetlərindən biridir"

Agentlik rəsmisi: "İKT sahəsində insan kapitalının formalaşdırılması dövlətin prioritetlərindən biridir"

"Azərbaycanda İKT sahəsində insan kapitalının formalaşdırılması, bu sahədə fəaliyyət göstərən gənclərin bilik və bacarıqlarının artırılması dövlətin prioritet istiqamətlərindən biridir".

AzTehsil.com xəbər verir ki, bu fikirləri İnnovasiya və Rəqəmsal İnkişaf Agentliyinin (İRİA) təşkilatçılığı ilə ali təhsil müəssisələrinin tələbə və məzunları üçün keçirilən "İKT Karyera Sərgisi"ndə İnnovasiya və Rəqəmsal İnkişaf Agentliyinin İdarə heyətinin sədr müavini Rəşad Xalıqov deyib.

O bildirib ki, "Azərbaycan Respublikasında Rəqəmsal İnkişaf Konsepsiyası" ölkənin rəqəmsal inkişafının əsas elementlərini ehtiva edən bir konsepsiya sənədidir:

"Bu konsepsiyaya əsasən, Azərbaycanda rəqəmsal inkişaf üç əsas sütun üzərində formalaşdırılıb. Bunlar rəqəmsal hökumətin formalaşdırılması, rəqəmsal cəmiyyətə keçidin təmin edilməsi, rəqəmsal biznesin sürətləndirilməsi və genişləndirilməsidir".

Sədr müavini əlavə edib ki, bu istiqamətlər və sütunların inkişafı üçün bir neçə fundamental məqam var: "Bunlardan ən əsas olanı ölkədə bu sahədə fəaliyyət göstərən insan kapitalının formalaşdırılmasıdır. Bu baxımdan, belə İKT karyera sərgiləri, gənclərin və şirkətlərin bir araya gəlməsi, onların qarşılıqlı əlaqə qurması, bir-birilərinin tanıması baxımdan əhəmiyyətli platformadır. Builki sərgiyə 900-dən çox gəncin müraciət etməsi doğrudan da bu sahəyə marağın böyük olmasının göstəricisidir".

Qeyd edək ki, İRİA-nın təşkilatçılığı ilə keçirilən "İKT Karyera Sərgisi"ndə ali təhsil müəssisələrinin tələbə və məzunları, həmçinin İRİA-nın təhsil layihələrinin məzunları daxil olmaqla 900-dən çox gənc iştirak edir. Onlar ölkənin informasiya texnologiyaları sahəsində fəaliyyət göstərən 20 aparıcı dövlət və özəl qurumunun nümayəndələri ilə görüş imkanı əldə ediblər.