Naxçıvanda beynəlxalq konfrans KEÇİRİLİB
AzTehsil.com xəbər verir ki, ötən gün Quba filialının sosial və humanitar məsələlər üzrə direktor müavini Naxçıvanda keçirilən beynəlxalq konfransda iştirak edib.
1-2 oktyabr 2025-ci il tarixlərində Naxçıvan Dövlət Universitetində “İnnovasiya və davamlı inkişaf yeni ideyalar və həllər” mövzusunda I Beynəlxalq Elmi konfrans keçirilib. Konfransla bərabər İnnovasiya və Rəqəmsal İnkişaf Agentliyinin (İRİA) və Universitetin birgə təşəbbüsü ilə Naxçıvan İnnovasiya Mərkəzinin açılış mərasimi keçirilib. Açılış mərasimində NDU-nun rektoru Elbrus İsayev, İRİA-nın İdarə Heyətinin sədri Fərid Osmanov, Naxçıvan MR Rəqəmsal İnkişaf və Nəqliyyat nazirinin müavini, nazir səlahiyyətlərini müvəqqəti icra edən Azər Məmmədrəhimov çıxış ediblər.
Naxçıvanda keçirilən beynəlxalq konfrans regionun ən böyük intellektual platformalarından biri kimi yadda qalıb. Konfrans 6 bölmə üzrə 28 paneldə davam edib. Tədbirə 500-dən çox müraciət daxil olub, onlardan 413-ü şifahi təqdimat üçün qəbul olunub. Beləliklə, 11-i xarici olmaqla 71 müəssisədən alim və mütəxəssislər məruzələrlə çıxış ediblər. Məruzəçilər sırasında ADPU-nun Quba filialının sosial və humanitar məsələlər üzrə direktor müavini p.ü.f.d Aysel Şeydayeva da yer alıb. A.Şeydayeva konfransda “ Qubada təhsil və inkişaf nümunəsi: ADPU-nun Quba filialı” adlı məqalə ilə çıxış edib, filial tarixi ilə yanaşı, son dövrlər professor Yusif Alıyevin rəhbərliyi ilə həyata keçirilən yenilik və innovasiyalar haqqında danışıb, şimal bölgəsində fəaliyyət göstərən universitetin əldə etdiyi uğurlardan söz açıb.
Qeyd edək ki, Bölmə iclaslarında Azərbaycanın müxtəlif bölgələrində fəaliyyət göstərən 61 elm və təhsil müəssisəsinin nümayəndələri də dinlənilib. Konfransda Təhsil və inkişaf, İnnovasiya sinergiyası: texnoloji, sosial və inkubasiya yanaşmaları, Süni intellektin davamlı inkişafa təsiri: ətraf mühit, Beynəlxalq hüquq və kibertəhlükəsizlik, Biologiya və tibb elmində rəqəmsal inqilab: diaqnostika və müalicədə yeni metodlar, Davamlı iqtisadiyyat, Mediada transformasiya prosesi: konvergensiya, rəqəmsal kommunikasiya və etika məsələləri başlıqları əsasında məruzərələr dinlənilib.Naxçıvan Dövlət Universitetində keçirilmiş “İnnovasiya və davamlı inkişaf: yeni ideyalar və həllər” I Beynəlxalq Elmi Konfransında iştirakıma şərait yaratdıqlarına görə hörmətli direktorumuz professor Yusif Alıyevə, Naxçıvan Dövlət Universiteti - NDU rektoru hörmətli Elbrus İsayevə təşəkkür edib.
İki gün davam edən konfransın sonunda iştirakçılara sertifikatlar təqdim olunub.
