ADPU-da Tələbə Gənclər Təşkilatının İdarə Heyətinin yeni tədris ilinin başlanmasına həsr edilmiş iclası keçirilib

 Sentyabr ayının 9-da Azərbaycan Dövlət Pedaqoji Universitetinin (ADPU) kiçik akt zalında Tələbə Gənclər Təşkilatının (TGT) İdarə Heyətinin 2016-2017-ci tədris ilinin başlanmasına həsr edilmiş iclası keçirilib. Iclasda ADPU-nun rektoru, professor Cəfər Cəfərov, Tərbiyə işləri üzrə prorektoru, professor Fikrət Rzayev iştirak ediblər. 

ADPU-nun rektoru, professor Cəfər Cəfərov iclasda çıxış edərək tələbələri yeni tədris ilinin başlaması münasibətilə təbrik edib, onlara həyatda və təhsildə uğurlar arzulayıb. Rektor qeyd edib ki, gənclik, xüsusən də, tələbəlik illəri insan həyatının ən gözəl, ən qiymətli dövrüdür. Gənclik enerjidir, inamdır, ümiddir, gələcəyə doğru atılan perspektivli addımların başlanğıcıdır. Məhz bu dövrdə insan öz bilik və bacarıqlarını formalaşdırır. Sonradan bu bilik və bacarıqlar zamanın tələblərinə uyğun olaraq yenilənir, təkmilləşir. Bu da təbiidir, çünki hər bir insan daim elmi potensialını artırmalı, genişləndirməlidir. Bu həm də insanın rəqabət və mübarizə mühitinə uyğunlaşmasında həlledici rol oynayır. Siz ali təhsil illərində həm yaxşı təhsil almalı, həm də ictimai təşkilatların işində fəal iştirak etməlisiniz. Eyni zamanda asudə vaxtınızın mənalı və səmərəli təşkilinə xüsusi diqqət yetirməlisiniz. İctimai təşkilatların işində fəal iştirak etməyiniz sizin idarəçilik qabiliyyətinizin formalaşmasına müsbət təsir göstərəcəkdir. Hazırda ADPU-da geniş islahatlar həyata keçirilir. Universitetdə təhsilin və tədrisin keyfiyyətinin yüksəldilməsi, sağlam təhsil mühitinin yaradılması, idarəetmənin optimallaşdırılması üçün məqsədyönlü fəaliyyət gerçəkləşdirilir. Xüsusi qeyd etmək istəyirəm ki, ADPU-nun yeni imicinin, işgüzar nüfuzunun formalaşdırılması bizim ən vacib vəzifələrimizdən biridir. Siz fəalliyyətinizi genişləndirməli, yenilikçi və geniş düşüncəli olmalı, mütərəqqi təşəbbüslərlə çıxış etməlisiniz. Siz eyni zamanada tədris və imtahan prosesinin səmərəli, şəffaf və obyektiv təşkil edilməsində universitet rəhbərliyinə kömək etməlisiniz. Hazırda ölkəmizdə müəllim hazırlığına xüsusi diqqət yetirilir. Müasir düşüncə baxımından təhsil də xidmət sahəsidir və bu sahənin optimallaşdırılması vacibdir. ADPU bizim ümumi evimizdir. Biz ADPU-nu müasir tələblərə cavab verən bir ali təhsil müəssisəsinə çevirməliyik. Onu da qeyd etmək istəyirəm ki, hərtərəfli bilik və bacarığa malik yüksəkixtisaslı pedaqoji kadrların hazırlanması həm də ölkəmizin milli təhlükəsizliyi üçün çox vacibdir. 

ADPU-nun Tərbiyə işləri üzrə prorektoru, professor Fikrət Rzayev çıxış edərək bildirib ki, TGT universitetdə həyata keçirilən islahatların aparılmasına dəstək verməli, fəal və nizam-intizamlı olmalı, öz tərkibini genişləndirməli, universitetin əmlakının qorunmasında yaxından iştirak etməlidir. Prorektor Fikrət Rzayev eyni zamanda tələbələrə daha təşəbbüskar olmağı, universitetin və eləcə də ölkəmizin ictimai-mədəni həyatında fəal iştirak etməyi, cəmiyyətimizin inkişafına xidmət edən layihələri həyata keçirməyi tövsiyə edib. 

TGT-nin sədri Cavid Hüseynov iclasda təşkilatın struktur dəyişiklikləri haqqında məlumat verib. İclasda TGT-nin İdarə Heyətinin yeni üzvləri seçilib, universitetə yeni qəbul olunmuş tələbələrlə işin aparılması və cari məsələlər müzakirə olunub, yeni tədris ili üçün fəaliyyət strategiyası müəyyən edilib. 

Rektor Cəfər Cəfərov iclasda tələbə-gənclərin suallarını cavablandırıb.

ADPU-nun İctimaiyyətlə Əlaqələr Şöbəsi