Bəzi idarəedicilər məktəblərdə şagirdlər arasında xəbərçilik mədəniyyətinin formalaşmasına şərait YARADIR
Məktəblərdə qruplaşmaların artması və idarəetmədəki problemlər.
AzTehsil.com xəbər verir ki, müasir dövrdə məktəblərdə yalnız təhsil prosesinə deyil, şagirdlərin sosial münasibətlərinə də diqqət yetirmək vacibdir. Son illərdə bir çox məktəbdə şagirdlər arasında qruplaşmaların artması müşahidə olunur ki, bu da tədris mühitinə mənfi təsir göstərir. Qruplaşmaların yaranması təkcə şagirdlərin davranışından deyil, bəzən məktəb rəhbərliyinin və müəllimlərin fəaliyyətindən də asılıdır.
Qruplaşmaların əsas səbəbləri arasında sosial fərqlilik, şagirdlərin maddi imkan və sosial status fərqləri, populyarlıq axtarışı və sosial media təsiri göstərilə bilər. Eyni zamanda ailədaxili münasibətlər və tərbiyə faktorları da şagirdlərin bir-biri ilə münasibətlərinə təsir edir. Nəticədə bəzi şagirdlər təcrid olunur və mobbinq halları baş verir.
Problem yalnız şagirdlər arasında deyil. Təəssüf ki, bəzi məktəblərdə əvəzedici direktorlar və bir neçə müəllim şagirdlər arasında xəbərçilik və intriqa mədəniyyətinin formalaşmasına şərait yaradır. Belə hallarda dərs prosesi ikinci plana keçir, şagirdlər arasında etimadsızlıq və qarşıdurma yaranır. Məktəb rəhbərliyi və müəllimlərin ədalətsiz davranışı qruplaşmaların möhkəmlənməsinə və sinif mühitinin parçalanmasına səbəb olur.Şagirdlərə dərs zamanı təhsil yox digər müəllimlər haqqında söhbətlər aparılır. Bu da gələcəkdə onların həyatlarına böyük zərbə vurur.
Qruplaşmaların mənfi təsirini minimuma endirmək üçün bir sıra tədbirlər həyata keçirilməlidir. İlk növbədə, məktəbin əsil ( imtahan da uğur qazanan)rəhbərliyi və müəllimlər arasında ədalətli və bərabər yanaşma təmin olunmalıdır. Məktəb daxilində etik davranış qaydaları tətbiq edilməli, psixoloq və sosial işçilər aktiv şəkildə şagirdlərin sosial bacarıqlarının inkişafına dəstək göstərməlidir. Həmçinin, şagirdlərə empatiya, hörmət və birlik kimi dəyərlər aşılanmalıdır.
Nəticə etibarilə, məktəbdə sağlam və təhlükəsiz tədris mühiti yalnız şagirdlərin deyil, həm də rəhbərliyin və müəllim heyətinin vicdanlı və ədalətli münasibətindən asılıdır. Məktəb rəhbərliyi və müəllimlər hər bir şagirdi ayrı-seçkilik etmədən dəstəkləyərək, tədris prosesini əsas prioritetə çevirərsə, qruplaşmaların yaratdığı mənfi halların qarşısı alınmış olar.
Qeyd: Bu hallar ən çox əvəzedici direktorlar tərəfindən aparılır , onlarda onlara müvəqqəti həvalə olunmuş vəzifəsindən sui-istifadə edirlər.
