Beynəlxalq sammitdə BMU ilə əməkdaşlıq görüşləri keçirilib
Beynəlxalq sammitdə BMU ilə əməkdaşlıq görüşləri keçirilib
Xəbər verdiyimiz kimi, Bakı Mühəndislik Universiteti (BMU) Çin Xalq Respublikasında keçirilən “Universitet Tərəfdaşları Sammiti Hangzhou 2025”də iştirak edir.
AzTehsil.com xəbər verir ki, Universitetdən verilən məlumata görə, Çinin Beihang Universitetinın təşkilatçılığı ilə baş tutan və Şanxaydan start götürən sammit Hangzhou şəhərində davam edib. Burada beynəlxalq birgə laboratoriyaların açılışı keçirilib və müxtəlif əməkdaşlıq sazişləri imzalanıb. Mərasimdə Çinin Beynəlxalq Mütəxəssislər üzrə Dövlət İdarəsi, İnsan Resursları və Sosial Təminat Nazirliyi, Təhsil Nazirliyi, Zhejiang, həmçinin Hangzhou rəhbərliyi, Beihang Universiteti və digər dövlət qurumları, ali məktəblərin nümayəndələri çıxış ediblər. Çıxışlarda innovasiyaya əsaslanan təhsil sisteminin gücləndirilməsi, insan kapitalının inkişafı, həmçinin elmi-tədqiqat əməkdaşlığının ölkələrarası strateji tərəfdaşlıqların möhkəmlənməsində rolu xüsusi vurğulanıb.
Tədbirin davamında “Yenilikçi, Əməkdaşlığa əsaslanan və Əhatəli Davamlı Qlobal Tərəfdaşlıqların Qurulması” mövzusuna həsr olunan sammitin baş məruzəsi təqdim edilib. Məruzədən sonra dünyanın müxtəlif ölkələrindən
gəlmiş alimlər, universitet rektorları, prorektorların iştirakı ilə dəyirmi masa müzakirələri, eləcə də Beihang Universiteti dekanları ilə tərəfdaş ali məktəblərin rəhbərləri arasında sərbəst qrup mübadiləsi aparılıb.
İştirakçılar qlobal elmi tərəfdaşlıq, innovasiya yönümlü təhsil və dayanıqlı inkişaf hədəfləri ətrafında mövqelərini paylaşıb, elm, təhsil sahəsində qarşılıqlı əməkdaşlığa dair təkliflərini səsləndiriblər.
BMU-nun beynəlxalq əlaqələr üzrə prorektoru Ətrabə Gül tədbir çərçivəsində tərəfdaş universitetlərin rəhbərləri ilə birgə layihələrin icrası, müəllim və tələbə mübadiləsi, həmçinin elmi tədqiqatların inkişaf etdirilməsi istiqamətində fikir mübadiləsi aparıb. Sammitdə iştirak edən Braziliya, İspaniya və bir sıra ölkələrin dövlət universitetlərinin təmsilçiləri ilə ayrıca görüşlərdə ali təhsil ocaqlarının birgə əməkdaşlıq təşəbbüsü irəli sürülüb, əlaqələrin yaradılmasının beynəlxalq akademik şəbəkənin genişlənməsi baxımından əhəmiyyəti vurğulanıb.
