Xaricdə təhsili seçənlər diqqətli olmalıdır
Hazırda minlərlə abituriyent xaricdə təhsil almaq üçün müraciət edir. Lakin mütəxəssislər xəbərdarlıq edirlər ki, bəzi universitetlərdən alınan diplomların Azərbaycanda tanınmaması gələcəkdə ciddi problemlərə yol aça bilər. Bu, həm magistratura və doktorantura təhsili almaq, həm də dövlət və özəl sektorda işləmək baxımından abituriyentlərin karyerasına mənfi təsir göstərə bilər.
AzTehsil.com xəbər verir ki, təhsil eksperti Rizvan Fikrətoğlu açıqlamasında bildirib ki, xaricdə təhsil almaq istəyənlərin qarşılaşa biləcəyi ən böyük risklərdən biri də məhz diplomların tanınması ilə bağlıdır.
Onun sözlərinə görə, diplomun tanınması Elm və Təhsil Nazirliyinin tabeliyində fəaliyyət göstərən Təhsildə Keyfiyyət Təminatı Agentliyi tərəfindən müəyyənləşdirilir:
“Agentlik hər il tanınan və ya tövsiyə olunan universitetlərin siyahısını açıqlayır. Abituriyentlər xaricdə təhsil üçün müraciət etməzdən əvvəl mütləq şəkildə bu siyahı ilə tanış olmalıdırlar. Əks halda gələcəkdə diplomun tanınmaması kimi problemlərlə üzləşə bilərlər”.
Rizvan Fikrətoğlu bildirib ki, universitet seçərkən bir sıra məqamlara diqqət etmək vacibdir:
“İlk məqam odur ki, təhsil müəssisəsi mütləq şəkildə həmin ölkədə akkreditasiya olunmalıdır. Onlayn və ya distant proqramlar üzrə verilən diplomlar hazırda Azərbaycanda tanınmır. Qısa müddətli, sürətli bakalavr proqramları (1-2 illik kurslar) da etibarlı hesab edilmir. Universitetin beynəlxalq reytinq cədvəllərində yeri tanınma şansını artırır”.
Ekspertin sözlərinə görə, Azərbaycan üçün ən çox tanınan universitetlər sırasında Türkiyənin İstanbul Universiteti, Ankara Universiteti, Hacettepe, ODTÜ, Boğaziçi və Ege universitetləri, həmçinin Polşada Varşava Universiteti, İtaliyada Sapienza və Bolonya Universiteti, Macarıstanda ELTE, eləcə də ABŞ və Böyük Britaniyada Harvard, MIT, Oxford, Cambridge, UCL kimi ali məktəblər var.
“Yalnız xarici filial statusu daşıyan, yeni açılmış və ya rəsmi akkreditasiya almamış universitetlərdən uzaq durmaq lazımdır. Çünki belə universitetlərin diplomları çox zaman tanınmır və gənclər sonradan böyük çətinliklərlə üzləşirlər”.
Ekspert əlavə edib ki, xaricdə təhsil almaq istəyənlər seçdikləri universitet barədə mütləq şəkildə Təhsildə Keyfiyyət Təminatı Agentliyi ilə məsləhətləşməli, rəsmi məlumat almalıdırlar:
“Əgər tələbə dövlət proqramı, Erasmus, DAAD və digər beynəlxalq təqaüd layihələri çərçivəsində xaricə göndərilirsə, həmin universitetlərin diplomlarının tanınması məsələsində risk yoxdur, çünki onları birbaşa nazirlik özü göndərir”.
