ADNSU ilə Çin universitetləri arasında əməkdaşlıq...
Azərbaycan Dövlət Neft və Sənaye Universitetində (ADNSU) Çin Xalq Respublikasının nümayəndə heyəti ilə görüş keçirilib. Görüşdə ADNSU-nun rektoru dosent Rüfət Əzizov çıxış edərək universitetin təhsil imkanları, beynəlxalq əlaqələri, reytinqlərdəki mövqeyi, maddi-texniki bazası və ikili diplom proqramları barədə ətraflı məlumat verib.
AzTehsil.com xəbər verir ki, Çin tərəfini təmsil edən Quançjou Bələdiyyəsi Xalq Hökumətinin Xarici Əlaqələr Ofisi Baş Direktorunun müavini xanım Ruan Xiaohong iki ölkə arasında artan əməkdaşlıq əlaqələrinə diqqət çəkərək, Azərbaycan və Çin liderlərinin son görüşündən sonra bu istiqamətdə daha da fəallaşdıqlarını bildirib, xüsusilə də təhsil sahəsində əməkdaşlıqda maraqlı olduqlarını qeyd edib.
Görüş zamanı ADNSU ilə Quançjou şəhərində yerləşən Cənubi Çin Texnologiya Universiteti arasında əməkdaşlıq imkanları geniş müzakirə olunub. Tədqiqat layihələrinin həyata keçirilməsi, yeni texnologiyaların tətbiqi, tələbə və müəllim mübadiləsi, birgə laboratoriyaların yaradılması və ortaq elmi işlərin aparılması kimi istiqamətlər əməkdaşlıq sahələri kimi nəzərdən keçirilib. Sonda xatirə hədiyyələri təqdim edilib. Qonaqlar universitetin Tarix və Mineralogiya muzeylərində olub, universitetin tarixi və minerallar haqqında ətraflı məlumat əldə ediblər.
