"Mən özümü fədakar müəllim hesab etmirəm."

 Bu gün cəmiyyətimizdə bəzi gənclər peşə vəzifələrini ən ucqar kəndlərdə yerinə yetirirlər. Onlar necə deyərlər, gözdən-könüldən uzaqda olsalar da, şəhərdə fəaliyyət göstərənlərdən daha yararlı, daha vacib işlə məşğuldular. Elə bizim növbəti müsahibimiz kimi. Lənkəran rayonunun Gəgiran kənd tam orta məktəbində tarix müəllimi işləyən Həbib Əlizadəni sosial şəbəkə izləyicilərinin demək olar ki, çoxu yaxşı tanıyır. Dərsi uşaqlara sevdirmək üçün, qeyri-adi tədris üsulları ilə məhşurlaşan müəllim "Aztehsil.com”un suallarını cavablandırıb.

Əvvəlcə sizi yaxından tanıyaq. 

Öncəliklə çox təşəkkür edirəm. Mən Əlizadə Həbib 1991-ci ilin 22 yanvarında Astara rayonunun Şüvi kəndində doğulmuşam. 2008-ci ildə Şüvi kənd tam orta məktəbini bitirmişəm. 2012-ci ildə Lənkəran Dövlət Universitetinin Tarix və ictimaiyyət ixtisasını bitirmişəm. 2015-ci ildə Müəllimlərin işə qəbul imtahanında 51 bal toplayaraq Lənkəranın ucqar Gəgiran kəndində işə başlamışam.

Son zamanlar mətbuatda özünə məxsus metodlarla dərs keçməsi ilə gündəmə gəlib, tanınmayan ucqar bir kənddə işləyən bir müəllimin qısa müddətdə təhsil ictimaiyyətində tanınması sizdə hansı təəssüratları yaratdı?

Ordakı fəaliyyətimizi zaman-zaman sosial şəbəkələrdə paylaşırdıq. Amma on/off formatlı video daha çox bəyənildi. Əvvəlcə dəyərli dostlarım tanışlarım paylaşdı sonra da səhifələr. Təbii ki, bunu gözləmirdim. Sonra idmançılara müraciət etdim. O xeyli paylaşıldı. Ən son Cümhuriyyətimizin 99 illiyinə həsr edilmiş repli tarix dərsi daha ciddi marağa səbəb oldu. Əlbəttə bunlar çox yaxşı motivasiya oldu mənim üçün. Əslində bu mənim şəxsində ucqarlarda işləyən gənc müəllimlərə dəstək sayıla bilər. Çalışacam ki digər gənc müəllimləri də bu fəaliyyətə cəlb edim.

Gənc yaşda müəllimlik fəaliyyətinə ucqar kənddə başlamaq fədakarlıq nümunəsidir. Siz özünüzü fədakar müəllim hesab edirsiz?

Mən özümü fədakar müəllim hesab etmirəm. Düzdür bu sözü tez-tez eşidirəm. Amma əslində heç də belə deyil. Sadəcə olaraq öz üzərimə düşən vəzifəni yerinə yetirirəm. Yəni bu mənim işimdir. Bunu etməliyəm. Təəsüf ki,  bu gün bir çox insan öz işini vicdanla görmədiyi üçün mənfi mənzərə ortaya çıxır. Hamı öz işini görsə ölkədə problem azalar.

Yeni təlim texnologiyalarını, metodlarını ucqar kənd məktəblərində səmərəli tətbiq edilməsi mümkündürmü? 

Ucqar məktəblərdə çətinliklər çoxdur. Amma bununla belə yeni təlim üsullarının tətbiqi mümkündür. Ümumiyyətlə hər hansı təlim üsulunun tətbiqi uğurun mütləq əldə edilə biləcəyi mənasına gəlmir. Bir nömrəli hədəf şagirdin sevgisini qazanmaqdır. Şagirdin sizə sevgisi varsa mütləq tətbiq etdiyiniz yeniliklər müsbət nəticə verəcək. Uğurlu müəllim olmanın iki qızıl qaydası var: 1. Şagirdə sevgi göstərmək, şagirdə dəyər vermək.  2. Nizam-intizam. Əgər siz söz verib etmirsinizsə, onda şagird sizə etibar etməyəcək. Və sonra şagirddən də onu tələb etdiyimiz zaman nəticəsi olmayacaq. Əgər mən yanlış etdiyimdə şagirddən üzr istəmirəmsə onda şagird üzr istəməyəcək. Yəni o şagirddə formalaşmayacaq.

Fikrinizcə, hansı məsələlər həll olunsa, kənddə təhsilin keyfiyyəti arta bilər?

Mütləq gənc müəllimlər daha çox cəlb edilməlidir. Bu gün ucqarlarda gənc müəllimlərin hələ də çətinlikləri var. Onların şəraitlərinin yaxşılaşması üçün nəsə edilməlidir. Ucqar məktəblər təmir olunmalıdır. Şagirdləri məktəblərə cəlb etmək üçün maraqlı tədbirlər, yarışmalar təşkil edilməlidir. Valideynlərlə daha yaxın, səmimi görüşlər keçirilməlidir. Yeni təlim üsullarına üstünlük verilməlidir. Çünki bir çox halda yeniliklər tətbiq olunmur. Ən əsası hər bir müəllim, idarəçi işinə vicdanla yanaşsa heç bir problem qalmaz.

Güzəştli şərtlərlə ucqar kəndlərə müəllim işləməyə gedənlər məcburdurlar ki, 3 il həmin yerdə işləsinlər. 3 il bitdikdən sonra yenidən Lənkəran rayonu Gəgiran kənd tam orta məktəbində işləmək fikriniz var?

Hazırda fəaliyyətim davam edir. Açığı hələ dəqiq bir qərar verməmişəm. Işlədiyim kəndin çox ciddi yol və nəqliyyat problemi var. Əgər nəqliyyat məsələsini həll edə bilsəm davam etmək olar. 

Həbib müəllim, qarşıdan müəllimlərin işə qəbul imtahanı gəlir. Müəllimlərə tövsiyəniz nədir?

Müəllimlərə uğurlar arzu edirəm. Hansı məktəbdə işə qəbul olunursa olunsunlar işlərinə sevgi ilə yanaşsınlar, şagirdlərinə dəyər versinlər. Problemlər hər zaman var. Əsas işimiz şagirdləri bir dəyərli insan kimi yetişdirmək olmalıdır. Tolstoy demişkən fənnini sevən və bilən müəllim yaxşı müəllimdir. Bununla yanaşı şagirdini sevən müəllim əsl müəllimdir. Ümid edirəm ki əsl müəllim olarlar. Elə mən də arzulayıram ki özüm əsl müəllim ola bilim.

Gənc müəllimlərə burdan demək istərdim ki, çətinliklərə rəğmən ucqarlara getsinlər. Çünki ucqarlarda yaşayan şagirdlərin sizə daha çox ehtiyyacı var.