Müəllim olmaq fədakar olmaq deməkdir - Gənc müəllim Zahir Abbasov.

Təhsil Nazirliyinin keçirdiyi müəllimlərin işə qəbulu müsabiqəsində yüksək nəticə göstərən Zahir Abbasov Göygöl rayon Danayeri kənd ümumi orta məktəbində riyaziyyat müəllimi olaraq çalışır. Pedaqoji fəaliyyətə yeni başlayan Zahir Abbasov Gəncə Dövlət Universitetinin riyaziyyat və informatika fakültəsini bitirib. Rayon mərkəzindən 23 km məsafədə yerləşən Danayeri kəndində çalışan Zahir Abbasov hər gün Gəncə şəhərindən bu məktəbə gəlmək üçün 40 km yaxın məsafə qət edir. Zahir Abbasov işini sevdiyini, çətinliklərin onun üçün problem yaratmadığını deyir:

"Müəllimlik peşəsini mən hər zaman üstün tutmuşam. Bu peşəni seçəndə bütün çətinlikləri, problemləri, uzaq dağ kəndində çalışmağı belə gözə almışam. Müəllim olmaq fədakar olmaq deməkdir. Çünki mən sevdiyim işlə məşğul oluram. Şagidlərlə ilk gün çox maraqlı keçdi. Hər kəs "yeni müəllim gəldi” deyirdi. Hamının mənə qarşı münasibəti yaxşıdır. Müəllimlər, şagirdlər, kənd camaatı mənə çox hörmət edirlər. Şəhərdə ali təhsil alıb, orada yaşamağıma baxmayaraq mən ucqar bir kənddə müəllimlik edirəm və bununla qürur duyuram. V, VII, IX siniflərdə riyaziyyat dərsini tədris edirəm. Dərs prosesində kurikulumdan istifadə edirəm. Bu şagirdləri dərsə cəlb etməkdə, dərsi sevdirməkdə əvəzolunmaz vasitədir. Tədris prosesində daha çox sərbəst olmaq mənim üçün önəmlidir. Əsas məsələ şagirdin məktəbdən nə isə öyrənərək getməsidir. Məktəbin tədris mühiti yaxşıdır. Danayeri kəndi ucqar kənddir, ancaq burada hər şey qaydasındadır. Tədris prosesində şagirdlərin riyaziyyatdan bilik və bacarıqlarını təkmilləşdirmək əsas məqsədimdir. Ümid edirəm ki, bu tədris ilində bunu bacaracağam. Bütün müəllimlərə və müəllim olmaq istəyənlərədemək istəyirəm ki, peşələrini sevsinlər, işlərini sevərək, istəyərək görsünlər, şagirdlərə nə isə öyrətmək həvəsində olsunlar. Unutmayaq ki, cəmiyyətimizdə müəllimə qarşı çox böyük hörmət var. Bu hörməti qoruyub saxlamaq hər bir müəllimin borcudur."

Raminə Məmmədova.Göygöl.