Elşən Qafarov: Elə müəllimlər var ki, mənzil şəraitinə görə övladını evləndirə bilmir

Təhsil üzrə ekspert bildirib ki, məktəbdə pul yığılırsa, iki günahkar var: biri direktor, digəri isə valideyndir.

Hazırda Azərbaycanda 200 mindən artıq müəllim çalışır ki, bunun da təxminən 70 faizi ümumtəhsil məktəblərinin payına düşür. Hər bir ölkənin gücü onun insan kapitalına bağlıdır. Təhsilin, müəllimlərin əsas vəzifəsi insan kapitalı yetişdirməkdir. Son on ildə təhsildə müəyyən islahatlar gedir, lakin qarşıda görüləcək işlər çoxdur. Təhsil sahəsində müəyyən araşdırmalar aparılmalıdır, ehtiyaclar öyrənilməlidir və mövcud neqativ hallar aradan qaldırılmalıdır.

Bunu Sputnik Azərbaycan-ın qonağı, təhsil üzə ekspert Elşən Qafarov 5 oktyabr Beynəlxalq Müəllim Günü ilə bağlı danışarkən deyib.

Müəllim rifahının yaxşılaşdırılması üçün nələr edilməlidir?

Müəllimlərin sosial vəziyyətindən danışan ekspert bildirir ki, Azərbaycan müəlliminin rihafı nə qədər artsa da, azdır:

“Repetitorluq, kölgə təhsilinin Azərbaycan təhsilinə vurduğu ziyanları azaltmaq üçün müəllimin əmək haqqısının yenidən artırılmasına ehtiyac var. Müəllimlərin mənzil şəraitinin daha da yaxşılaşdırılması, onlara faizsiz ipotekaların verilməsi arzuolunandır. Elə müəllimlər var ki, mənzil şəraitinə görə övladını evləndirə bilmir. Lakin rifahla yanaşı Azərbaycan müəlliminin peşəkarlıq səviyyəsi də artırılmalıdır. Bu iki amil bir-birini tamamlamalıdır. Təəssüflər olsun ki, Azərbaycan müəlliminin peşəkarlığı ölkənin inkişaf səviyyəsinə uyğun deyil”.

“Problemlərə gəldikdə isə, təhsil elə bir sahədir ki, burada problemlər heç zaman bitməyəcək”, – deyə o, əlavə edib.

Sertifikasiya təhsilə nə qazandırır?

Müəllimlərin sertifikasiyadan keçməsini müsbət hal kimi dəyərləndirən ekspert qeyd edir ki, bu proses 2026-cı ilədək başa çatmalıdır:

“Sertifikatlaşmanın keçirilməsində məqsəd müəllimlərin peşəkarlığını yoxlamaqdır. Düşünürəm ki, müəllim peşəsinə uyğun olmayan şəxslərlə yollar ayrılacaq”.

Müəllimə gül-çiçək hədiyyə edilməlidirmi?

Ekspert deyir ki, Elm və Təhsil Nazirliyinin müəllimlər günü ilə bağlı paylaşımı onda təəssüf hissi yaradıb:

“Müəllimə top-tüfəng deyil, gül-çiçək hədiyyə edərlər. Müəllim elə bir şəxsdir ki, təkcə 5 oktyabrda deyil, ilboyu diqqətdə olmalıdır. Müəllimin ən böyük hədiyyəsi diqqət və ehtiramdır. Amma istənilən halda müəllim günü ilə bağlı pul yığmaq yolverilməzdir. Məktəbdə pul yığılırsa, iki günahkar var: biri direktor, digəri isə valideyndir. Amma etiraf edək ki, bizim şəffaf işləyən və nümunə götürüləcək məktəb direktorlarının da sayı az deyil. Müəllim üçün ən gözəl hədiyyə şagirdlərin açıqcalarıdır”.