"Peşə təhsili rəqabət mühitinə çevrilib"- Ekspert
"Əvvəllər valideynlərin və abituriyentlərin böyük əksəriyyəti yalnız ali məktəblərə qəbul olmağı əsas məqsəd hesab edirdi, peşə məktəblərinə maraq isə çox aşağı idi. Lakin Elm və Təhsil Nazirliyinin həyata keçirdiyi kompleks tədbirlər nəticəsində vəziyyət köklü şəkildə dəyişib. Peşə təhsili müəssisələrinin modernləşdirilməsi, infrastrukturun yenilənməsi, əmək bazarının tələblərinə uyğun ixtisasların açılması və məzunların işlə təminatına dair zəmanətlərin verilməsi nəticəsində bu gün peşə məktəblərinə qəbul prosesində yüksək rəqabət formalaşıb".
AzTehsil.com- n əldə etdiyi məlumata görə bu fikirləri peşə təhsilindən danışan təhsil eksperti Kamran Əsədov bildirdi. Onun sözlərinə görə, 2015-ci ildə peşə məktəblərinə sənəd verənlərin sayı cəmi 6 min nəfər idisə, 2023-cü ildə bu rəqəm artıq 26 min nəfəri keçib:
"Bu isə beş dəfədən çox artım deməkdir. Hazırda ölkədə 130-dan çox peşə təhsili müəssisəsi fəaliyyət göstərir və onların əksəriyyəti son illərdə əsaslı təmir olunub, maddi-texniki bazası yenilənib. Əvvəllər köhnəlmiş binalarda fəaliyyət göstərən peşə məktəbləri bu gün müasir avadanlıqlarla təchiz olunub, tələbələr praktik bilikləri birbaşa istehsalat bazasında qazana bilirlər. Nazirliyin verdiyi məlumata görə, peşə məktəblərinin məzunlarının 80 faizdən çoxu təhsilini bitirdikdən dərhal sonra əmək bazarında işlə təmin olunur. Bu fakt özü göstərir ki, peşə təhsili artıq işsizlikdən qurtulmaq üçün real alternativə çevrilib. Azərbaycan Respublikasının “Təhsil haqqında” Qanununun 27-ci maddəsində açıq şəkildə qeyd olunur ki, peşə təhsili dövlətin iqtisadiyyatının inkişafı üçün zəruri olan ixtisaslı kadrların hazırlanmasını təmin etməlidir. Elm və Təhsil Nazirliyinin gördüyü tədbirlər bu maddənin reallaşdırılması istiqamətində mühüm addımlardır. Əgər əvvəllər peşə təhsilinə maraq az idisə, indi artıq eyni ixtisasa çoxsaylı müraciətlərin daxil olması nəticəsində yüksək bal toplayan abituriyent belə kənarda qala bilir. Bu isə yalnız bir şeyi göstərir: peşə təhsili rəqabət mühitinə çevrilib və hamı bu məktəblərə qəbul olmaq istəyir. Bu, təhsil siyasətinin uğur göstəricisidir".
Ekspert əlavə etdi ki, peşə məktəbləri regional inkişafı da dəstəkləyir.
"Bakı ilə yanaşı, regionlarda açılan yeni peşə mərkəzləri gənclərin paytaxta üz tutmasının qarşısını alır, onları yerli istehsalat müəssisələri ilə əməkdaşlıq çərçivəsində işlə təmin edir. Məsələn, Gəncə, Mingəçevir və Sumqayıtda fəaliyyət göstərən müasir peşə mərkəzlərində tələbələr həm oxuyur, həm də paralel olaraq əmək bazarına uyğun bacarıqlar qazanırlar. Bu, həm gənclərin sosial rifahını, həm də ölkə iqtisadiyyatının dayanıqlılığını gücləndirir.
Peşə məktəblərinə marağın kəskin artması, rəqabətin güclənməsi və qəbul mexanizmlərində baldan əlavə digər amillərin nəzərə alınması təhsil sistemində müsbət dəyişikliklərin göstəricisidir. Elm və Təhsil Nazirliyi bu istiqamətdə həyata keçirdiyi siyasəti ilə tərifəlayiqdir, çünki bu gün peşə təhsili nəinki əvvəlkindən fərqli olaraq cəlbedici sahəyə çevrilib, həm də ölkənin iqtisadi inkişafına birbaşa təsir edən dayanıqlı bir sistem kimi formalaşıb. Bu islahatlar göstərir ki, dövlət yalnız ali təhsilə deyil, həm də peşə təhsilinə ciddi önəm verir və bu, gələcəkdə həm gənclərin, həm də ümumilikdə Azərbaycanın inkişafına böyük töhfə olacaq", - deyə Kamran Əsədov vurğulayıb.
