"Valideyinin vəzifəsi məktəbi maliyyələşdirmək deyil"
"Valideynin vəzifəsi uşağının təhsilini dəstəkləməkdir, məktəbi maliyyələşdirmək deyil". -Yeni tədris ilinin başlanmasına sayılı günlər qalıb. "Ənənəvi" olaraq bu il də məktəbqabağı neqativ hallar artıq özünü göstərməyə başlayıb. Bir sıra məktəblərdə valideynlərdən “sinif təmiri” üçün əlavə vəsait yığılması halları müşahidə olunur. AzTehsil.com xəbər verir ki mövzu ilə bağlı redaktor.az-a açıqlamasında keçmiş deputat, təhsil eksperti Sona Əliyeva bildirdi ki, yeni tədris ili başlamamış, neqativ halların baş verməsi ilə bağlı söyləntilər artıq eşidilməyə başlayıb.Halbuki dövlətimiz məktəblərin təmirinə, tikintisinə və infrastrukturun yaxşılaşdırılmasına hər il vəsait ayırır. Belə halların baş verməsi valideynlərdə haqlı narazılıq yaradır və məktəb-valideyn münasibətlərinə kölgə salır. Təhsil pulsuz və əlçatan olmalıdır, əlavə ödənişlərin tələb edilməsi qanunsuzdur. Əgər, belə hallara rast gəlinirsə, bu halın qarşısı qəti şəkildə alınmalıdır. Əgər hansısa məktəbdə təmirə ehtiyac varsa, bu məsələ rəsmi şəkildə aidiyyəti qurumlara çatdırılmalı, valideynlərin üzərinə yük qoyulmamalıdır".Ekspert əlavə etdi ki, valideynin vəzifəsi uşağının təhsilini dəstəkləməkdir, məktəbi maliyyələşdirmək deyil."Məktəblərdə şəffaflıq gücləndirilməli, valideynlərin şikayət edə biləcəyi mexanizmlər işlək vəziyyətə gətirilməli və ictimai nəzarət artırılmalıdır. Təhsil mühiti hər kəs üçün ədalətli, şəffaf və övladlarımızın gələcəyinə layiq şəkildə təşkil olunmalıdır. Bu kimi hallara yol verənlər varsa, onlar müəllim olmağa, rəhbər vəzifə tutmağa layiq deyillər. Belə halları mütləq şəkildə ictimailəşdirmək, sosial qınağa çevirmək daha effektiv üsul olar, nəinki onları digər həmkarlarına şikayət etmək",- deyə Sona Əliyeva yekunlaşdırıb.
