”Peşəyönümlü təhsilin inkişafına yardım” ictimai birliyi layihənin icrasını davam etdirir.

PEŞƏYÖNÜMLÜ  TƏHSİLİN  İNKİŞAFINA  YARDIM”  İCTİMAİ   BİRLİYİ  (PTİY İB)  1 sentyabr  2022-ci il tarixindən  Qeyri-Hökumət Təşkilatlarına Dövlət Dəstəyi Agentliyi tərəfindən maliyyələşdirilən  “Tələbə və məktəblilərin açıq təhsil resurslarından (Open Educational Resources - OER) istifadəyə hazırlanması tədbirləri”   adlı layihənin icrasına başlamışdır.   

2  ay müddətində icra ediləcək layihənin əsas ideyası  şagirdləri  və tələbələri açıq təhsil resurslarından (Open Educational Resources - OER) istifadəyə hazırlamaqdır.     

Məlum olduğu kimi YUNESKO-nun son 10 ildəki siyasəti elm, təhsil və mədəniyyət yönümlü  məlumatların açıq, əlyetərli və pulsuz olmasına yönəlib. Təhsil sahəsində İKT-nin tətbiqi onun səmərəsini dəfələrlə artırır. Lakin bu  məqsədlə təhsil yönümlü xüsusi tədris resurslarına ehtiyac yaranır. Belə resurslar isə azdır. Bir çox ölkələr öz  məktəblərini  kompüterlərlə təchiz edib, onları İnternetə qoşduqdan sonra da tədrisdə onlardan səmərəli istifadə mümkün olmur. Çünki, müvafiq elektron tədris resursları vaxtında hazırlanmamışdır. Bu məqsədlə bütün dünyada mövcud elektron kontentə açıq,  əlyetərlik imkanı yaradılması siyasəti həyata keçirilir. 

Bizim ölkəmizdə  də 10  il   əvvəl  Açıq Təhsil Resursları  (ATR)  az   idi.  Lakin 2014-cü ildən sonra xeyli resurslar yaradıldı. Xüsusən də pandemiya dövründə teledərslərin yaradılması istiqamətində konkret işlər görüldü, yüzlərlə tele-video- dərslər  hazırlandı və İnternetdə (TN-nin xüsusi saytlarında və qismən də youtube platformasında) yerləşdirildi. Bundan bir müddət əvvəl isə məktəb dərslikləri elektron formatda  (əsasən PDF variantda) və zənginləşdirilmiş elektron dərsliklər formatında (multimedia imkanlı)  qeyd edilən saytlarda yerləşdirildi. Bunlar hamısı ATR hesab edilir.  Layihə  çərçivəsində şagirdləri və tələbələri bu resurslarla tanış edəcəyik. 

Layihənin  indiki mərhələsində  zəruri kontentin seçilməsi prosesi icra edilir.