İxtisasartırma yolu ilə müəllim olanların aqibətini nə gözləyir? – Ekspert

AzTehsil.com xəbər verir ki, son illər müəllimlərin bilik səviyyəsinin yoxlanılması istiqamətində aparılan uğurlu işlər öz bərhəsini verməkdədir. Təhsil Nazirliyi tərəfindən Müəllimlərin Diaqnostik Qiymətləndirilməsi müəllimlərin imtahan yolu ilə öz bilik səviyyələrinin yoxlanılmasına xidmət edir. Bu xidmət nəticəsində respublikanın ümumtəhsil məktəblərində çalışan müəllimlər öz biliklərindən xəbərdar olmaqla yanaşı, eyni zamanda, yüksək əmək haqlarına da nail olurlar. Ümumtəhsil məktəblərində dərs deyən müəllimlərin bəziləri qeyri-ixtisas sahibləri olsa da, sonradan ixtisasartırma və ixtisasdəyişmə yolu ilə müəllimlik ixtisasına da yiyələniblər. Maraqlısı odur ki, 4 il və daha çox ali təhsil müəssisələrində müəllimlik ixtisasına yiyələnənlərlə sonradan qeyri-ixtisas sahiblərinin ixtisasartırma yolu ilə müəllim  olanların fəaliyyəti arasında heç də fərq görünmür. Biri azı 4 il zəhmət çəkib müəllim ixtisasına sahib olur, digəri isə 1 il müddətinə müəllimlik ixtisasına yiyələnir.

Sual meydana çıxır ki, müəllim olmaq üçün ixtisasartırmanın mövcud olduğu halda, daha ali təhsil müəssisələrində müəllim ixtisaslarına nə ehtiyac var idi?

Məsələ ilə əlaqədar olaraq Kanal15.tv-yə açıqlama verən təhsil eksperti Kamran Əsədov bildirib ki, məhz bu problem üzündən təhsilimizdə ciddi irəliləyiş olmur: "Təsəvvür edin ki, biri 4 il dinşünaslıq oxuyur, sonra gedib 6 ay ixtisas dəyişmədə vaxt keçirib gəlib Azərbaycan dili müəllimi olur. Bu, onu göstərir ki, biz müəllimlik peşəsinə adi yanaşırıq. Yəni kim iş tapa bilmirsə, eybi yox, gəlib burda vaxt keçirə bilər. Təsəvvür edin ki, Finlandiyada müəllim işləmək üçün təkcə müəllimlik ixtisasını bitirmək yetərli deyil, siz həm də bu ixtisas üzrə magistr pilləsini də bitirməlisiniz. Bilirsiz, təhsili, müəllimliyi ciddiyə almaq lazımdır. Ümummilli Lider Heydər Əliyev deyirdi ki, mən müəllim adından üstün ad tanımıram. Amma indi bir çoxalrı bu adı adiləşdiriblər”.

Ekspert bildirib ki, Azərbaycanda ümumtəhsil məktəblərində ixtisaslı kadlara olan tələbat ixtisasartırma kimi fakültənin yaradılmasına zəmin yaradıb: "İlk növbədə qeyd edim ki, ixtisas dəyişmə ancaq keçmiş possovet ölkələrinə xas olan xüsusiyyətdir. Dünyada qəbul edilmir. Amma Azərbaycanda ixtisaslı kadrların azlığı və ya bütün ixtisaslıların işləmək istəməməsi müəyyən ixtisaslar üzrə boşluqların yaranması ilə nəticələndi. Dövlət də kadra olan tələbatı aradan qaldırmaq üçün bu halı normal qəbul edib”.

K.Əsədov ixtisasartırma yolu ilə müəllimlik peşəsinə yiyələnənlərin işlərini itirmə təhlükəsinin olub-olmamasında danışıb. O bildirib ki, belə bir təhlükə onları demək olar ki, gözləmir: "Hesab edirəm ki, hal-hazırda ixtisas dəyişmə ilə müəllim kimi fəaliyyət göstərənləri hansısa bir təhlükə gözləmir. Bir halda ki, onlar qanuni əsaslarla həm əsas ali təhsil sənədini əldə ediblər, həmdə ki, ixtisasdəyişmə qanunvericilik çərçivəsində həyata keçrilib. Onlar əgər Diaqnostik Qiymətləndirmə imtahanlarında iştirak ediblərsə və minimum şərtləri ödəyiblərsə, fəaliyyətlərini davam etdirməkdə heç bir problem yoxdu”.

Səid Qərib