“ETN Yüksək Texnologiyalar Parkı” və “Study in Azerbaijan” ilə görüş keçirilib
“ETN Yüksək Texnologiyalar Parkı” və “Study in Azerbaijan” ilə görüş keçirilib.
AzTehsil.com xəbər verir ki, Elm və Ali Təhsil üzrə Dövlət Agentliyində “ETN Yüksək Texnologiyalar Parkı” MMC (YTP) və “Study in Azerbaijan” MMC ilə birgə görüş baş tutub. Görüşdə YTP-nin baş direktoru Nihat Məcidov və “Study in Azerbaijan” MMC-nin nümayəndəsi Zemfira Məmmədova iştirak ediblər.
Agentliyin direktoru Ülkər Səttarova ölkə başçısının “Ali təhsildə yeni məzmunlu təhsil proqramlarının əhatə dairəsinin genişləndirilməsi və maliyyələşdirilməsi barədə” Sərəncamına əsasən SABAH proqramının mərhələlərlə genişləndirilməsi istiqamətində görülən işlərdən danışıb. O, həmçinin YTP ilə bu çərçivədə həyata keçiriləcək “SABAH.city” innovasiya şəhərciyi layihəsinin biznes mühiti ilə elm və ali təhsil arasında əlaqələrin güclənməsinə töhfə verəcəyini qeyd edib.
Eyni zamanda, ali təhsil müəssisələrinin qlobal rəqabət qabiliyyətinin artırılmasında əcnəbi tələbələrin rolunu vurğulayan Ülkər Səttarova universitetlərin bu istiqamətdə daha sıx əməkdaşlıq etməsinin vacibliyini diqqətə çatdırıb.
Müzakirələr zamanı cari ilin 14 fevralında YTP ilə Azərbaycanın aparıcı ali təhsil müəssisələri arasında imzalanmış strateji əməkdaşlığa dair Anlaşma Sazişindən irəli gələn məsələlər nəzərdən keçirilib.
Bundan əlavə, “Study in Azerbaijan” tərəfindən əcnəbi vətəndaşların ölkəmizdə ali təhsilə cəlb olunması, mövcud marketinq imkanlarının genişləndirilməsi və beynəlxalq tələbə cəlbi ilə bağlı görülən işlər, eləcə də hazırkı fəaliyyət istiqamətləri barədə məlumat təqdim olunub və fikir mübadiləsi aparılıb.
