Qubada beynəlxalq təlim iştirakçıları nümunəvi orta məktəbi ziyarət ediblər
Qubada beynəlxalq təlim iştirakçıları nümunəvi orta məktəbi ziyarət ediblər.
AzTehsil.com xəbər verir ki, 23–30 noyabr tarixlərində Azərbaycan Dövlət Pedaqoji Universitetin Quba filialında təlimlərə qatılan Özbəkistanın yeni müəllimlər qrupu Quba rayonunun Rəhman Məmmədov adına Alekseyevka kənd tam orta məktəbini ziyarət edib.
Qonaqları filialın əməkdaşları müşayiət edib. Məktəbin həyətində pedaqoqları milli geyimli şagirdlər qarşılayıb. Direktor Sevil Allahverdiyeva məktəbin fəaliyyəti və tədris mühiti barədə qonaqlara qısa məlumat verib. Şagirdlərin Azərbaycan və özbək dillərində təqdim etdiyi bədii kompozisiyalar müəllim heyətinin rəğbətini qazanıb.Heyət məktəbdə yaradılan infrastruktur, eləcə də yenilənmiş sinif otaqları, laboratoriya və kitabxanaya baxış keçirib. Şəhidlər guşəsində təqdim olunan materiallar özbək pedaqoqlarda dərin təsir yaradıb. Onlar Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində əldə olunan tarixi Zəfərin məktəbdə xüsusi ideoloji xətt kimi qorunmasını yüksək qiymətləndiriblər. Səfər çərçivəsində qonaqlar dərsləri izləyib, müəllim və şagirdlərlə fikir mübadiləsi aparıblar. Məktəbin direktoru Sevil Allahverdiyeva ADPU-nun Quba filialı ilə məktəb arasında əməkdaşlığın yeni mərhələyə yüksəldiyini vurğulayaraq filialın direktoru, fizika elmləri doktoru, professor Yusif Alıyevə dəstəyinə görə təşəkkür edib. O bildirib ki, məktəbdə formalaşdırılan müasir təhsil mühiti ümummilli lider Heydər Əliyevin təhsil strategiyasının Prezident İlham Əliyev tərəfindən uğurla davam etdirilməsinin nəticəsidir. Sonda xatirə fotoları çəkdirilib.
