Quba filialının direktor müavini “Hüquq Liderliyi Düşərgəsi”ndə çıxış edib
Quba filialının direktor müavini “Hüquq Liderliyi Düşərgəsi”ndə çıxış edib.
Azərbaycan Respublikasının Gənclər və İdman
Nazirliyinin, Gənclər Fondunun dəstəyi və Azərbaycan Tələbə Gənclər Təşkilatları
İttifaqının təşkilatçılığı ilə, 2025-ci ilin ölkəmizdə “Konstitusiya və Suverenlik İli” elan
olunması münasibətilə Quba rayonunda yerləşən Quba Olimpiya İdman Kompleksində “Hüquq Liderliyi” adlı düşərgə keçirilib. Tədbirin məqsədi tələbə gənclərin vətənpərvərlik ruhunda formalaşmasına, hüquqi
maariflənməsinə, dövlətçilik və suverenlik dəyərlərinə hörmət hissinin artırılmasına,
həmçinin asudə vaxtlarının səmərəli təşkili və şəxsi inkişafına töhfə vermək olub. Qeyd edək ki, düşərgə çərçivəsində “Konstitusiya və Suverenlik İli”nə uyğun mövzular üzrə panel görüşlər, təlimlər, qrup işləri, eləcə də tarixi məkanlara səfərlər təşkil olunub.
“Hüquq Liderliyi Düşərgəsi” çərçivəsində keçirilən ideoloji sessiyada gənclər Ulu Öndər Heydər Əliyevin müəyyənləşdirdiyi Azərbaycançılıq ideyasının mahiyyəti və bu ideyanın dövlət suverenliyinin qorunmasındakı strateji rolu barədə dəyərli bilgilər əldə ediblər.
AzTehsil.com xəbər verir ki, Quba Heydər Əliyev Mərkəzinin direktoru Sevinc Səlimova və Azərbaycan Dövlət Pedaqoji Universitetinin Quba filialının direktor müavini p.ü.f.d Aysel Şeydayeva gənclərlə “Heydər Əliyev İrsi və Dövlətçilik Məktəbi” mövzusu ətrafında interaktiv müzakirə aparıblar. Sessiya zamanı milli kimlik, vətəndaş məsuliyyəti, dövlətə sədaqət kimi dəyərlərin formalaşması, eləcə də Heydər Əliyevin rəhbərliyi dövründə formalaşmış “suverenlik məktəbi”nin prinsipləri ətraflı təhlil olunub.
