9 May - Qələbə Günü münasibətilə onlayn dəyirmi masa keçirilib

Mayın 8-də Təhsil Nazirliyi Respublika Uşaq-Gənclər İnkişaf Mərkəzi tərəfindən 1941-1945-ci illər Böyük Vətən müharibəsində faşizm üzərində qələbənin 76-ci ildönümünə həsr olunmuş "Zəfər günü” mövzusunda onlayn dəyirmi masa keçirilib.

COVİD-19 pandemiyası səbəbəbilə onlayn keçirilən dəyirmi masanın məqsədi uşaq və gənclərin vətənpərvərlik ruhunda böyümələri, vətəninə və xalqına layiqli övlad kimi yetişmələri, həlak olan soydaşlarımızın xatirəsinin ehtiramla yad olunması, Böyük Vətən müharibəsi illərində Azərbaycan xalqının həm ön, həm də arxa cəbhədə göstərdiyi qəhrəmanlıq həmçinin İkinci Qarabağ müharibəsində Azərbaycan ordusunun şanlı qələbəsi haqqında gənc nəsli məlumatlandırmaqdan ibarətdir.

Dəyirmi masada Böyük Vətən müharibəsinin iştirakçıları, o günlərin canlı şahidləri və İkinci Qarabağ müharibəsinin qaziləri iştirak edib. Tədbirdə çıxış edən Səbail rayon Veteranlar təşkilatının sədri Adilə Yaqubova və 1941-45 il Böyük Vətən müharibəsinin 100 yaşlı veteranı Əli Nəsirov Azərbaycan xalqının faşizm üzərində tarixi qələbəyə əhəmiyyətli töhfələr verdiyini, müharibə zamanı göstərdikləri igidliyə görə 130-dan çox Azərbaycan vətəndaşının Sovet İttifaqı Qəhrəmanı adına layiq görüldüyünü, 170 mindən çox əsgər və zabitin müxtəlif orden və medallarla təltif edildiyini, bu Qələbədə Azərbaycan neftinin həlledici rol oynadığını bildirib.

İkinci Qarabağ müharibəsinin qaziləri Alik Yusifov və Namiq Babayev cıxış edərək bildiriblər ki, həm 9 May - Qələbə Günü, həm də 8 noyabr – Zəfər günü Azərbaycan xalqının fəxr etdiyi, qürurlandığı unudulmaz tarixdir. Xalqımızın hər iki Vətən müharibəsində qələbənin qazanılmasında yazdığı qəhrəmanlıq salnaməsi bugünkü nəsil üçün əsl mənəviyyat dərsidir.

Tədbirdə Sovet İttifaqı Qəhrəmanları Mehdi Hüseynzadə, İsrafil Məmmədov, Aslan Vəzirov, Adil Quliyev, Ziya Bünyadov və iki dəfə Sovet İttifaqı Qəhrəmanı olmuş yeganə azərbaycanlı general-mayor Həzi Aslanov haqqında mərkəzin dərnək üzvlərinin hazırladığı videoçarxlar və təqdimatlar nümayiş olunub.

Qələbə Günü və bu tarixi hadisə haqqında məlumatların gənc nəslə çatdırılması ilə bağlı onlayn dəyirmi masaya 100 nəfər dərnək üzvü cəlb edilib.