Məktəblərdə yayılan “İltizam” sənədinə MÜTDA-dan CAVAB
Xəbər verdiyimiz kimi, son vaxtlar bir çox məktəblərdə valideynlərdən “İltizam” adlı sənədi imzalamaq tələb olunur. Sənədə əsasən, valideynlər övladlarının məktəbdəki davranış və nizam-intizam qaydalarına əməl etməsinə görə tam məsuliyyəti üzərilərinə götürürlər.
Sənəddə geyim forması, dərsə davamiyyət, məktəb əmlakına zərər vurmaq, dərsdən qaçma, həmçinin pedaqoji heyətə qarşı hörmətsizlik kimi hallara görə valideynin məsuliyyət daşıdığı qeyd olunur. Bu praktika valideynlər arasında ciddi müzakirələrə səbəb olub. Bəziləri sənədi məktəbdə intizamın qorunması üçün zəruri hesab etsə də, digərləri bunun hüquqi əsasının olmadığını və valideynlərin təzyiq altında imza atmağa məcbur qaldığını bildirir.
AzTehsil.com xəbər verir ki, məsələ ilə bağlı Məktəbəqədər və Ümumi Təhsil üzrə Dövlət Agentliyinə sorğu ünvanlayıb. Cavabda bildirilib ki, ümumi təhsil müəssisəsinin Nizamnaməsinə əsasən hər məktəb daxili “Şagird intizam qaydası” təsdiq edib:
"Qaydalarla həm şagirdlər, həm də valideynlər tanış edilir. Əsas budur ki, valideynlər qaydalarla tanışdır və övladlarının onun tələblərinə əməl etməli olduğunu qəbul edir. Təhsil müəssisələrində nizam-intizamın qorunması və sağlam tədris mühitinin yaradılması əsas prioritetlərindən biridir. Bu istiqamətdə valideynlərin məsuliyyəti və məktəblə əməkdaşlığı xüsusi əhəmiyyət daşıyır".
Agentliyin açıqlamasında qeyd olunur ki, “İltizam” sənədi bu məsuliyyətin xatırladılması və valideyn-məktəb əməkdaşlığının gücləndirilməsi məqsədi daşıyır:
"Valideynlərə müraciət edirik ki, övladlarının məktəb həyatında fəal iştirak etsinlər, onların dərs davamiyyətinə, geyim qaydalarına, məktəb mühitindəki davranışına və müəllim-şagird münasibətlərinə diqqət yetirsinlər".
