"Ali təhsil alan qızlar " - ƏTRAFLI
“Xüsusilə mühəndislik və texniki sahələrə meyil göstərən gənc qızların sayı artır. Bu isə o deməkdir ki, gələcək nəsildə analar daha çox ali təhsilli olacaq. Statistik hesablamalara görə, 2030-cu illərin sonlarına doğru bu təsir daha aydın görünəcək. Yəni bu gün ali təhsil alan qızlar yaxın 10–15 il ərzində ana olacaq və onların övladları artıq daha təhsilli bir mühitdə böyüyəcəklər”.
AzTehsil.com xəbər verir ki, bu fikirləri bu gün elm və təhsil naziri Emin Əmrullayev “Gənc qızların təhsilinə dəstək” layihəsi çərçivəsində həyata keçirilən “Hənifə Məlikova-Zərdabi adına təqaüd proqramı 2025”in təqdimat mərasimində səsləndirib.
O qeyd edib ki, hər bir qızın aldığı təhsil gələcək nəsilə böyük təsir göstərir: “Əsas məqam odur ki, cəmiyyətimizdə qadınların və qızların həm təhsildə, həm iqtisadi sahədə, həm də iş həyatında layiqli imkanlarla təmin olunsun. Bu prosesdə Azərbaycan kişilərinin də rolu böyükdür.
Qadınların təhsili və müstəqil inkişafı kişilərin uğur və təhlükəsizlik hissini əngəlləmir, əksinə, cəmiyyəti daha güclü və balanslı edir. Qadınlar cəmiyyətdə bərabər hüquqlu vətəndaşlar kimi iştirak etdikdə həm ailədə, həm iş yerində, həm də ümumi sosial həyatda müsbət dəyişikliklər baş verir”.
O əlavə edib ki, hər bir ailə üzvü, həmçinin iş yerində hər bir şəxs qadınların təhsil və inkişaf imkanlarını dəstəkləməli, münasibət dəyişikliklərini dərk etməlidir.
