“Gürcüstan azərbaycanlılarının ana dili və ədəbiyyat tədrisi tələbi haqlıdır”
“Gürcüstan azərbaycanlılarının ana dili və ədəbiyyat tədrisi tələbi haqlıdır”
Gürcüstan azərbaycanlıları “Etnik azlıqların dili” fənninin təhsil proqramından çıxarılmasını və onun əvəzinə “Azərbaycan dili və ədəbiyyatı” fənninin daxil edilməsini istəyirlər. Məsələ ilə bağlı orada yaşayan azərbaycanlılar tərəfindən petisiya da keçirilib.
AzTehsil.com xəbər verir ki, mövzu ilə bağlı danışan təhsil eksperti Elçin Süleymanov bildirdi ki, xalqların öz dilini və ədəbiyyatını öyrənməsi, bunun təhsil proqramı çərçivəsində həyata keçirilməsi onların hüququdur:
"Gürcüstanda kifayət qədər azərbaycanlı yaşayır, onların məktəbləri Azərbaycan dilində fəaliyyət göstərir və dərsliklərlə də Azərbaycan təmin edir. Öz dillərini və ədəbiyyatlarını öyrənmək onların təbii haqqıdır. Buna görə düşünürəm ki, Gürcüstan hökuməti bu istəyə müsbət yanaşmalıdır. Ümumiyyətlə, nəyisə öyrənmək və inkişaf etdirmək cəmiyyət üçün faydalı bir addımdır. Doğrudur, Gürcüstanda yaşayan azərbaycanlılar gürcü dilini də öyrənməli, imtahanlarda yüksək nəticə göstərərək Gürcüstanın dövlət və biznes qurumlarında özlərini daha yaxşı reallaşdırmalıdırlar. Amma eyni zamanda, milli kimliklərini qorumaq üçün dil və ədəbiyyat bilikləri onlara faydalı olar".
