Təhsil əlaqələrinin möhkəmləndirilməsi ...- ƏTRAFLI
"Türk dövlətləri ilə birgə tələbə təqaüdləri təşkil oluna bilər". Bu fikri Türkmənistan Xalq Məsləhətinin Sədri Qurbanqulu Berdiməhəmmədov Türk Dövlətləri Təşkilatının Dövlət Başçıları Şurasının 12-ci Zirvə Görüşündə səsləndirib.
AzTehsil.com xəbər verir ki, açıqlamasında Milli Məclisin deputatı Ceyhun Məmmədov bildirdi ki, türk dövlətləri arasında bir çox sahələr üzrə əməkdaşlıq sürətlə genişlənir:
"Bu, son günlərdə keçirilən Türk Dövlətləri Təşkilatının növbəti sammitində də aydın şəkildə özünü göstərdi. Sammit çərçivəsində verilən bəyanatlar və səsləndirilən fikirlər onu göstərir ki, bu dövlətlər əlaqələrin daha da gücləndirilməsində və inkişaf etdirilməsində maraqlıdırlar. Bu isə, təbii ki, ortaq hədəflərimizə, məqsədlərimizə və amallarımıza doğru birgə addımlamağımız baxımından xüsusi əhəmiyyət və mühüm rol daşıyır".
Müsahibimizin sözlərinə görə, türk dövlətləri arasında əlaqələrin möhkəmləndirilməsi istiqamətində atılacaq əsas addımlardan biri təhsil sahəsində əməkdaşlığın genişləndirilməsidir.
"Təhsil əlaqələrinin daha da möhkəmləndirilməsi və bu sahədə əməkdaşlığın gücləndirilməsi qarşılıqlı inteqrasiya baxımından son dərəcə vacibdir. Bu istiqamətdə əməkdaşlığa və əlaqələrin inkişafına daha çox önəm verilməlidir. Bu mənada, birgə təqaüdlərin təsis olunması və tələbələrə təqdim edilməsi xüsusi əhəmiyyət kəsb edən məsələdir. Belə təşəbbüslər ortaq hədəflərə və ümumi məqsədlərə doğru birgə irəliləməyə ciddi töhfə verə bilər. Bu baxımdan ortaq təqaüd proqramlarının yaradılması və tələbələrin dəstəklənməsi olduqca faydalı və məqsədəuyğun bir addım olardı", - deyə Ceyhun Məmmədov yekunlaşdırıb.
