Yeni tikilən bağçalar niyə gec təhvil verilir? - AÇIQLAMA
“Bir bağçanın tikilməsinə maliyyə çox sərf olunur. 14 bağça 2023-2024-cü illərdə açılıb, 4-nü də bu il açmışıq. 6 bağça isə açılacaq. İnsanlar bəzən narazılıq edirlər ki, bağça tikilibsə, hazırdırsa, niyə istifadəyə verilmir? Biz başa salmağa çalışırıq ki, müəyyən prosedur qaydalar var. Bağça təhvil-təslim edilməlidir”.
AzTehsil.com xəbər verir ki, bunu İctimai TV-nin “Sabaha saxlamayaq” verilişinin qonağı olan Məktəbəqədər və Ümumi Təhsil üzrə Dövlət Agentliyinin şöbə müdiri İlahə Rəsulova səsləndirib.
Onun sözlərinə görə, bunun üçün çoxlu sənədlər hazırlanmalı və onlar toplanaraq müvafiq orqana göndərilməlidir: ”Bəzən müəyyən problemlərə görə bu proses uzanır. Ümumiyyətlə, dünyada məktəbəqədər təhsil təkcə bağça vasitəsilə həyata keçirilmir. Onun alternativləri var, məsələn, icma əsaslı qruplar. Valideynin sadəcə evdə uşağı ilə 15 dəqiqə məşğul olması belə, o uşağın gələcəyinə və akademik nailiyyətlərinə çox müsbət təsir göstərir”.
İ.Rəsulova əlavə olaraq vurğulayıb ki, maksimum imkanlardan istifadə edərək bağçaların sayının artırılmasına, əhatə dairəsinin genişlənməsinə çalışılır.
