MİQ-in müsahibəsində maksimal bal toplayanlar
Təhsilverənlərin sertifikatlaşdırılması prosesinin 16-19 sentyabr tarixlərində təşkil olunan müsahibə mərhələsinin nəticələri məlum olub.
“Yüksək nəticəni xüsusi hazırlıqsız da toplaya bilərsən” – MİQ-in müsahibəsində maksimal bal toplayanlar
AzTehsil.com xəbər verir ki, "Azərbaycan müəllimi" qəzeti Şirvan-Salyan Regional Təhsil İdarəsi üzrə müsahibə mərhələsində maksimum nəticə toplayan bir neçə müəllimlə həmsöhbət olub.
Nurəddin Abasov Biləsuvar rayonu N.Nərimanov adına 6 nömrəli tam orta məktəbdə 12 ildir ki, kimya fənnini tədris edir. Test imtahanı mərhələsindən 51, müsahibə mərhələsindən isə 40 bal toplayıb:
"Müsahibə mərhələsi mənim üçün yaddaqalan bir təcrübə oldu. Orada təkcə bilik yox, həm də müəllimin düşüncə tərzi, şagirdlərə yanaşmas qiymətləndirilirdi. Suallara cavab verərkən sinifdəki gündəlik fəaliyyətimdən, şagirdlərimlə qurduğum münasibətdən danışdım. Bu məqam məni həm həyəcanlandırır, həm də qürurlandırdı. Düşünürəm ki, bu müsahibə müəllimlər üçün özünü təqdim etməyin, həm də peşəsinə olan sevgisini göstərməyin ən gözəl fürsətidir. Bu mərhələyə məsuliyyətlə hazırlaşmışdım. Sadəcə nəzəri biliklərlə kifayətlənmədim, pedaqoji təcrübəmi, dərsdə tətbiq etdiyim metodları da nəzərdən keçirdim. Ən əsası isə gündəlik müəllim fəaliyyətimə güvəndim. Çünki inanıram ki, müəllim üçün ən böyük hazırlıq onun hər gün sinifdə gördüyü işdir. Müsahibədə uğur qazanacağıma inanırdım. Çünki 12 il ərzində qazandığım təcrübə və dərsə olan bağlılığım məni bu mərhələyə hazır etmişdi".
Daha bir maksimum nəticə toplayan müəllim Elnarə Quliyevadır. O, Şirvan şəhər M.Osmanov adına 20 nömrəli tam orta məktəbdə çalışır. 21 ildir ki, biologiya fənnini tədris edir:
"Birinci mərhələdən 56, ikinci, müsahibə mərhələsindən isə 40 bal nəticə göstərdim. Müsahibə çox şəffaf keçdi. Demək olar ki, suallar hər bir müəllimin dərsdə tətbiq etdiyi fəaliyyətə dair idi. Müsahibə mərhələsinə hazırlaşırdım, əsasən tədris metodikası və fənn üzrə biliklərimi sistemləşdirdim. Uğur qazanacağıma inanırdım, çünki öz üzərimdə daima çalışıram".
Aytəkin Zöhrabova 2019-cu ildə Salyan rayon Noxudlu kənd tam orta məktəbində informatika müəllimi kimi pedaqoji fəaliyyətə başlayıb. 2022-ci ildən isə MİQ müsabiqəsində iştirak edərək Salyan şəhər 6 nömrəli məktəbdə fəaliyyətini davam etdirib:
"Öz üzərimdə daim işləməyim hesabına sertifikasiyanın 1-ci mərhələsində 60 balın 56-sını topladım, 2-ci mərhələdə isə maksimum nəticə göstərdim. Topladığım bal deməyə əsas verir ki, müəllim işinə sevərək və lazımi həssaslıqla yanaşarsa, illik, gündəlik planlamasını, qiymətləndirməni, eləcə də dərsin gedişatını mövzuya uyğun edərsə, özünü təkmilləşdirərsə, yüksək nəticəni hər hansı xüsusi hazırlıq etmədən də toplaya bilər. Necə ki, mən bunu bacardım”.
Nuranə Mahmudova da müsahibə mərhələsində maksimum nəticə göstərən müəllimlərdəndir. Hazırda Neftçala rayonu Bankə qəsəbə 2 nömrəli tam orta ümumtəhsil məktəbində informatika müəllimi işləyir:
"12 illik stajım var. Sertifikasiyanın birinci mərhələsində 58 bal toplamışam. Müsahibə mərhələsindən 40 bal toplamışam. Müsahibə mərhələsi şəffaf keçirildi, suallar orta səviyyədə idi, fənni, metodika və kurikulumu əhatə edirdi. Sertifikasiya imtahanının birinci mərhələsində olduğu kimi, ikinci mərhələsinə də hazırlaşmışam, bunun üçün həm həmkarlarımla müzakirələr aparmışam, həm də nümunəvi videoçarxlar izləmişəm. İmtahanın hər mərhələsinə məsuliyyətlə yanaşdım və bu yolda uğur qazanacağıma əmin idim. İlk əvvəl həyəcanın olması normal idi, daha sonra özümü tənzimlədim və sanki gündəlik kiminləsə söhbət edirmiş kimi verilən sualları cavablandırdım".
