"MİQ imtahanlarının ödənişli olması..." ETİRAZ

"MİQ imtahanlarının ödənişli olması "Təhsil haqqında" qanunla ziddiyyət təşkil edir" - Fazil Mustafadan etiraz.

Ötən gün keçirilən yeni tədris ilinə dair media birifinqində elm və təhsil naziri Emin Əmrullayev müəllimlərin işə qəbulu (MİQ) imtahanlarının ödənişli olacağını bildirib. O, bildirib ki, bu məsələyə Milli Məclisdə baxılır.

Qeyd edək ki, "Təhsil haqqında" qanunun 14.3 maddəsində göstərilir ki, Аzərbaycan Respublikasında dövlət təhsil müəssisələri bilavasitə mənfəət əldə etmək məqsədi güdmür. 

Bəs MİQ imtahanlarının ödənişli olması ilə bu qanun ziddiyyət təşkil edirmi?

AzTehsil.com- n əldə etdiyi məlumata görə mövzu haqqında danışan Milli Məclisin komitə sədri Fazil Mustafa bildirdi ki, bu, əlbəttə ziddiyyət təşkil edir.

"Ümumiyyətlə, insanların imtahana girməsini dövlət təşviq eləməlidir. Elmin, təhsilin inkişafı baxımından bu həyata keçirilməlidir. Dövlətin marağı budur ki, insanlar daha çox bilik əldə eləsinlər, daha çox təhsilə yönəlsinlər və daha çox cahil əhalinin sayı azalsın. O baxımdan da biz burada maneələri artıranda, pullu təhsil, pullu imtahan şəbəkəsini genişləndirəndə, onda insanların məhz bu amil üzərindən təhsilə meyllənməsinin qarşısını alırıq. O baxımdan da məncə təhsildə və təhsil müəssisələrində, təkcə bura aid deyil, idman qurğularında, idman müəssisələrində, bu hədsiz dövlət adına qurulmuş publik hüquqi şəxslər olsun, dövlətin büdcəsindən maliyyələşən qurumlar olsun, bunlar mənfəət barədə düşünməməlidirlər və qeyri-kommersiya fəaliyyəti kimi baxmalıdırlar".

Millət vəkilinin sözlərinə görə, biz təşviq eləməliyik ki, insanlar təhsilə yönəlsin, idmana yönəlsin:

"İndi bizdə musiqi təhsili də əslində mahiyyətcə belədir. Həm də insanlar onsuz da pullu təhsil alırlar, artıq pulsuz təhsil anlayışı gündəmdən çıxmağa başlayır. Çünki böyük əksəriyyət repetitorun yanına gedir və ora pul ödəməli olurlar. Bu, ailə büdcəsindən gedən puldur və əhalinin yoxsullaşmasına səbəb olan amildir. İmtahanlara da bunu əlavə edəndə, onda bu ağlasığmaz bir şey ortaya çıxa bilər. Ona görə də mənim düşüncəmə görə qanuna uyğun olaraq təhsil müəssisələrində bu cür imtahanın pullu modelinə keçidi təşviq eləmək lazım deyil. Ola bilsin ki, hansısa bir əlahiddə sahələr var, orada bu tələb oluna bilər. Amma kütləvi halda bu formada imtahan modellərinin təşviq edilməsi və tətbiq edilməsi yaxşı nəticələr doğurmaya bilər".