Humanitar-sosial fənlərin tədris olunmaması...- Ekspert
AzTehsil.com xəbər verir ki, mövzu ilə bağlı Yalçın İslamzadə Fb-səhifəsində öz fikirlərini bölüşüb. Orta məktəb tədrisində humanitar-sosial fənlərin tədris olunmaması, yəqin ki ən ciddi problemlərdən biridi. Yuxarı sinif şagirdləri humanitar fənlərdən sadəcə tarix və Azərbaycan dili və ədəbiyyatı öyrənirlər.
Azərbaycan dili və ədəbiyyatı birlikdə 5 saatdır. Dil və ədəbiyyat dərslərini 3 saatlıq "Ana dili və ədəbiyyat" dərsi kimi birləşdirmək olar. Qalan 2 saatı "Perspektivlər" adlı dərsə ayırmaq olar.
"Perspektivlər" dərsində humanitar fənlərin baxış bucaqlarını və əsas anlayışlarını təqdim etmək olar.
"Perspektivlər" = "fəlsəfə+psixologiya+sosiologiya+iqtisadiyyat"
Fəlsəfədən məntiq və silloqizm, sintetik zəka, bilik, qənaət, nəzəriyyə, fərziyyə, arqument, arqumentativ esse yazmaq kimi anlayışları və bacarıqları öyrətmək olar.
Psixologiyadan şəxsiyyət, inkişaf, koqnitiv proseslər, öyrənmə, uzun və qısa müddətli yaddaş kimi anlayşlara dair əsas fikirləri təqdim etmək olar.
Sosiologiyada ailə, dövlət, gender, qloballaşma, 21-ci əsr kimi konseptləri izah etmək olar.
İqtisadiyyatdan tələb-təklif, fürsət maliyyəti, 21-ci əsrin iş mühiti, 21-ci əsr bacarıqları kimi anlayışları tədqim etmək faydalı olar.
Bu fənlərin nailiyyətlərini öyrənmək həm şagirdləri yaşadıqları sosial-psixoloji-iqtisadi dünyanı anlamaq üçün lazım olan anlayışlarla təmin edər, həm də ana dilində düşünməyə, mühakimə aparmağa və dünyayla mənalı əlaqə qurmağa kömək edər.
