Qəbələli gənc Kembric Universitetinə qəbul olub
Qəbələli gənc Kembric Universitetinə qəbul olub.
2025/2026-cı tədris ili üzrə Dövlət Proqramı çərçivəsində xaricdə təhsil alacaq gənclərdən biri də Fidan Cəfərovadır.
AzTehsil.com - n əldə etdiyi məlumata görə, F.Cəfərova Kembric Universitetində biznesin idarə olunması üzrə magistratura təhsili alacaq.
“Qəbul xəbərini alarkən işdə olduğum üçün ilk iş yoldaşlarımla paylaşdım. Çox həyəcanlanmışdım. Daha əvvəl xaricdə olmuşam, amma London və Böyük Britaniyada heç vaxt olmamışam.
Qəbələdə doğulmuşam, məktəbi də orada bitirmişəm. 2018-ci ildə 685 balla Azərbaycan Dövlət İqtisad Universitetinə qəbul oldum və Bakıya köçdüm. Həmin vaxtdan ailəmdən ayrı yaşayıram. Ona görə də düşünmürəm ki, yeni mühitə uyğunlaşmaqda çətinlik yaşayım.
Universitetdə maliyyə ixtisası üzrə ingilis dilində təhsil almışam.
Əslində, Böyük Britaniyada yalnız iki universitetə müraciət etmişdim. Birindən fevralda qəbul almışdım, amma o, MBA proqramı deyildi. Mən isə biznesin idarə edilməsi üzrə magistr oxumaq istəyirdim. Buna görə də son tarixə az qalmış digər universitetə müraciət etdim. Müsahibədən sonra qəbul cavabı gələndə çox təəccübləndim. Çünki ən çox istədiyim də məhz bu universitet idi. Həm proqramı, həm də adı mənim üçün xüsusi önəm daşıyırdı.
Ailəm həmişə qərarlarımı dəstəkləyib. Xüsusilə təhsil və karyera ilə bağlı atdığım addımlarda daim arxamda olublar. Universitetin ilk illərindən demişdim ki, xaricdə oxumaq istəyirəm. Qəbul xəbərimi eşidəndə onlar da çox sevindilər, qəbul olmağım ailəm üçün də böyük qürur oldu”,- deyə o təəssüratlarını bölüşüb.
