Abituriyentlərimizin şansı gətirib
Xəbər verdiyimiz kimi, Dövlət İmtahan Mərkəzi (DİM) I və IV ixtisas qrupları üzrə 13 iyul 2025-ci il tarixində keçirilmiş qəbul imtahanının nəticəsini elan edib. Nəticələrə əsasən IV qrup üzrə 2 abituriyent 700 bal toplayıb.
Beləliklə, I, II və III ixtisas qrupları üzrə 700 bal toplayan olmayıb. Bəs bu qruplarda maksimum nəticə göstərənin olmamasının səbəbi nə ola bilər?
AzTehsil.com xəbər verir ki, mövzu ilə bağlı danışan təhsil eksperti Ramin Nurəliyev bildirdi ki, burda təbii ki, sualların da çətinlik səviyyəsi öz rolunu oynayır:
"Bununla yanaşı mən 700 bal məsələsini qlobal bir məsələyə çevirmək istəmirəm.Ümumiyyətlə, buraxılış imtahanında maksimum, yəni 300 bal toplayan abituriyentlər içərisindən 700 bal çıxa bilərdi. Çünki buraxılış imtahanında 300 bal toplayan abituriyentlərin blok imtahanında da 400 bal toplaması gərəkirdi ki, ümumilikdə bu 700 bal toplasın".
Təhsil eksperti bildirdi ki, 680 və 680-dən yuxarı bal toplayanla 700 bal toplayanın bilik səviyyəsi arasında o qədər də fərq görmür:
"680, 690, 695 bal toplayanlar 700 bal toplayanın biliyindədir. Burada sadəcə şans məsələsi də öz rolunu oynayır. Düşünürəm ki, bu şansdır. Misal üçün, o abituriyentlər əgər bir sualı düzgün cavablandırmasaydılar, 700 bal toplaya bilməyəcəkdilər və yaxud da bir sualda hər hansı bir texniki səhv olsaydı, 700 bal toplaya bilməyəcəkdilər. Ona görə də mən bunu bir şans olaraq düşünürəm. O şagirdlərimizin, o abituriyentlərimizin bu istiqamətdə şansı gətirdi və 700 bal topladı. Amma mənim nəzərimdə 680 balla 700 arasında olan bütün abituriyentlər elə maksimal bal toplamış kimidir".
R.Nurəliyev vurğuladı ki, yüksək bal toplayanın şansı ixtisas seçimində daha çox olur:
"Ona görə də 700 bal toplayanın şansı daha çox olacaq. Amma düşünsək ki, 680 balla qəbul olan da, 700 balla qəbul olan da eyni şəkildə eyni ixtisaslara müraciət etdiyi təqdirdə, hər ikisinin həmin ixtisasın dövlət sifarişinə qəbul olma imkanı, əlbəttə ki, var.
Ölkə səviyyəsində imtahanın maksimal balının toplanılması bir statusu var. Yəni 700 bal toplama bir statusu var. Bu o demək deyil ki, 680-690 bal toplayanların da savad səviyyəsi aşağıdır. Elə bir şey yoxdur. Sadəcə bir-iki texniki sual səhvinə görə maksimal balı əldə eləyə bilmədilər".
