Attestasiyadan kəsilən müəllimlərə ŞAD XƏBƏR
Azərbaycan Respublikası Mədəniyyət Nazirliyinin sistemindəki musiqi və incəsənət məktəblərində çalışan pedaqoji kadrların peşə səriştə və bacarıqlarının ölçülməsi, onların ixtisasına, sənətinə müvafiq olaraq tutduğu vəzifəyə uyğunluğunun müəyyənləşdirilməsi məqsədilə 2025-ci ilin fevral ayından etibarən regionlar və ixtisaslar üzrə mərhələlərlə müəllimlərin attestasiyasının keçirilməsinə başlanılıb.
Cari ilin fevral-iyul aylarında keçirilmiş attestasiya prosesi Bakı Şəhər Mədəniyyət Baş İdarəsi, Abşeron-Xızı, Mil-Muğan, Şirvan-Salyan və Quba-Xaçmaz regional mədəniyyət idarələrinin tabeliyindəki məktəblərdə, habelə Qara Qarayev adına Mərkəzi İncəsənət Məktəbində çalışan 3900-a yaxın müəllimi əhatə edib.
AzTehsil.com- n əldə etdiyi məlumata görə Modern.az-ın sorğusuna cavab olaraq Mədəniyyət Nazirliyindən bildirilib ki, attestasiya komissiyasının qərarına əsasən tutduğu vəzifəyə uyğun hesab edilməyən müəllimlərin əmək müqaviləsinə xitam verilib. Həmin müəllimlərin dərs saatları məktəbin digər müəllimləri arasında bölünüb və ya əvəzçilik üzrə tədris olunub.
Eyni zamanda, attestasiyadan kiçik səs çoxluğu (komissiya üzvlərindən 2 nəfərin lehinə və 3 nəfərin əleyhinə səsverməsi) ilə tutduğu vəzifəyə uyğun hesab edilməyən müəllimlər üçün təlimlərə cəlb olunmaq və xüsusi müsabiqədə iştirak edərək yenidən pedaqoji fəaliyyətə qayıtmaq imkanı yaradılıb. Xüsusi müsabiqə “Azərbaycan Respublikasının Mədəniyyət Nazirliyi tərəfindən musiqi, incəsənət, rəssamlıq, muğam, aşıq məktəb və mərkəzlərinə müəllimlərin işə qəbulu və yerdəyişməsi Qaydaları”nın tələblərinə uyğun olaraq keçiriləcək və müəllim müsabiqədə uğur qazandığı halda əvvəlki iş yerinə qəbul ediləcək.
Qeyd etmək lazımdır ki, 2015/2016-cı tədris ilindən etibarən Mədəniyyət Nazirliyinin tabeliyindəki musiqi və incəsənət məktəblərinə müəllimlərin işə qəbulu müsabiqə əsasında həyata keçirilir.
2022-ci ildən başlayaraq müsabiqə 2 mərhələdən – Dövlət İmtahan Mərkəzi ilə birgə keçirilən test və müsahibə mərhələsindən ibarət olaraq təşkil edilir, Hər iki mərhələ üzrə tələb olunan keçid balını toplamış namizəd uğur qazanmış hesab edilir və onun təyinatı ilə bağlı qərar verilir. 
