Qarabağ Universitetinin komandası qalib OLUB
AzTehsil.com xəbər verir ki, Qarabağ Universitetinin komandası Bakıda ilk dəfə keçirilən “Nə? Harada? Nə zaman?” intellektual oyunu üzrə “Tələbələrarası Azərbaycan Kuboku” layihəsinin final mərhələsində 2025-ci il üzrə “İlin klubu” nominasiyasının qalibi olub.Bakıda ilk dəfə keçirilən “Nə? Harada? Nə zaman?” intellektual oyunu üzrə “Tələbələrarası Azərbaycan Kuboku” layihəsinin final mərhələsi baş tutub.
Layihə 2025-ci ilin mart ayından etibarən Azərbaycanın 9 regionundan və Bakı şəhərindən ümumilikdə 28 ali təhsil müəssisəsinin tələbələrini əhatə edərək üç seçim və bir final mərhələsindən ibarət olmaqla həyata keçirilib.
Tədbirdə iştirak edən gənclər və idman naziri Fərid Qayıbov qeyd edib ki, tələbələrin intellektual inkişafı Azərbaycan gənclər siyasətinin əsas prinsiplərindən biridir.
Final mərhələsində keçirilən gərgin və maraqlı intellektual mübarizə nəticəsində Azərbaycan Dövlət Neft və Sənaye Universitetinin “Vendetta” komandası birinci yeri tutub.
Azərbaycan Tibb Universitetinin “Old School” və “HipHoprat” komandaları isə müvafiq olaraq ikinci və üçüncü yerləri bölüşüblər.
2025-ci il üzrə “İlin klubu” nominasiyasında isə Qarabağ Universitetinin intellektual oyunlar klubu fərqlənərək təşkilat tərəfindən mükafatlandırılıb.
Qaliblər təşkilatçılar tərəfindən kubok, medal, diplom və hədiyyələrlə mükafatlandırılıblar.
Layihə Gənclər və İdman Nazirliyi, Gənclər Fondu, Gənclər Təşkilatları Milli Şurası, Xəzər İntellektual Gənclər Klubu və Azərbaycan Təhsil İşçiləri Azad Həmkarlar İttifaqının birgə təşkilatçılığı ilə həyata keçirilib.
